ادتاج اتحادیه دمکراتیک ترک آذربایجان جنوبی
گادتب: 1979-جو ایلده گونئی آذربایجان و ایران آدلانان یئرده باش وئرن بهمن اینقیلابینی ایرتیجا‌چی و موستملکه‌چی فارس-موللا رئژیمی غصب ائتسه ده، بو اینقیلاب گونئی آذربایجانی ایشغال ائدیب، سویقیریم تؤرتمیش پهلوی رئژیمی‌نین سقوطونا سبب اولموش‌دور. صیرف پهلوی رئژیمی‌نین سقوطو و گونئی آزربایجانین اؤز حقوق‌لارینی برپا ائتمک اوغروندا مباریزه هله اینقیلابدان اؤنجه‌دن داوام ائدیردی. تصادفی دئییل‌دیر کی، گونئی آذربایجان هله بهمن اینقیلابین‌دان بیر ایل اؤنجه 29 بهمنده ایشغالچی و موستملکه‌چی پهلوی رئژیمینه قارشی عصیان قالدیریب و اینقیلابین اساسینی قویموش‌دور. چونکی، قاجار تورک دؤولتینی خاریجی ایمپئریالیست‌لرین کمکی ایله دئویریب، گونئی آذربایجان و مما‌لیک محروسه قاجاری غصب ائتمیش‌دیر. بو غصبکار رئژیم گونئی آذربایجاندا آذربایجان تورک میللتی‌نین دیلینی قاداغان ائدیب، میللتیمیزی بیر میللت کیمی محو ائتمک اوچون اونون بوتون تاریخی، مدنیتی و وارلیغینی تحریف ائده‌رک دانمیش‌دیر.
تورک حاکمیتینی غصب ائتمیش پهلوی رئژیمی اوسته‌لیک گونئی آذربایجاندا آذربایجان میللی حکومتی قورولان‌دان سونرا غرب ایمپئریالیست‌لری‌نین کمکی ایله یئنی‌دن گونئی آذربایجانا هوجوما کئچیب، آغیر سلاحلارلا گونئی آذربایجانی ایشغال ائتمیش و آذربایجان تورک میللتینه قارشی دهشت‌لی سویقیریم تؤرتمیش‌دیر. پهلوی رئژیمی 30-40 مین آزربایجانلینی سویقیریما معروض قویوب، وطنیمیزی ایشغال ائتمیش‌دیر. بو سبب‌لره گؤره آذربایجان تورک میللتی قانلی دوشمنی اولان پهلوی رئژیمینه قارشی جدی شکیلده مباریزه آپاریب و اینقیلاب ائتمیش‌دیر.
سؤزسوز کی، شاه رئژیمی‌نین دئوریلمه‌سی ایله آذربایجان تورکو گونئی آذربایجانی آزاد ائتمه‌یه چالیشمیش و دئموکراتیک آتموسفئر یارادا‌راق خالقین تهلوکه‌سیزلیگی و آساییشینی ساغلامیش‌دیر. لاکین بو دفعه ایرتیجا‌چی فارس-موللا رئژیمی یئنیجه آزادلیغا جان آتان گونئی آذربایجانا هوجوما کئچیب و ایرتیجا‌چی-جینایتکار قوه‌لری ایله گونئی آذربایجانی بیر داها ایشغال ائتمیش‌دیر.
پهلوی رئژیمی کیمی ایسلام رئسپوبلیکاسی اولان ایرقچی و ایشغالچی فارس-موللا رئژیمی ده گونئی آذربایجان اوچون فلاکت و بدبخت‌لیک‌دن باشقا هئچ نه وئرمه میش‌دیر. بونلارین هر ایکی‌سی ده گونئی آذربایجان قارشی ایرقچی، ایشغالچی و موستملکه‌چی اولموش‌لار. اونا گؤره ده هم موللا رئژیمی، هم ده یئنی شاهچی‌لار و رضا پهلوی‌نین یئنی حاکمیته گلیش هوسی گونئی آزربایجانین یئنی‌دن یئنی بیر فلاکته دوشمه تهلوکه‌سی ایله قارشی-قارشییا اولدوغونو گؤستریر.
گونئی آذربایجان دئموکراتیک تورک بیرلیگی (گادتب) پهلوی رئژیمی ایله موللا رئژیمینی آذربایجانا قارشی ایرقچی، موستملکه‌چی و ایشغالچی فارس رئژیمی‌نین مختلیف فورما‌لاری کیمی ده یرلندیریب، هر ایکی ایشغالچی و موستملکچینی رد ائدیر و میللتیمیزی آییق-ساییق اولماغا و تکجه خوشبخت‌لیک یولونون موستقیل‌لیک اولدوغونو بیلدیریر.
اژدر تاغیزاده
گونئی آذربایجان دئموکراتیک تورک بیرلیگی (گادتب) باشقانی
