ادتاج اتحادیه دمکراتیک ترک آذربایجان جنوبی
گادتب: روسیانین بؤلگه‌میزه آیاغینین آچیلدیغی گون‌دن آذربایجان تورک میللتی‌نین باشینا گتیریلن بلا‌لار و اونلارا قارشی تؤره‌دیلن سویقیریم‌لار توکنمک بیلمیر. میللتیمیزه قارشی تؤره‌دیلن بئله سویقیریم‌لاردان بیری ده 1992-جی ایلده بیرباشا روس قوشونونون حمایه‌سی و ایشتیراکی ایله تؤره‌دیلن خوجا‌لی سویقیریمی‌دیر. فئورالین 25-ده ائرمنی سلاحلی قوشونو سووئت اتفاقینین دؤورونده خانکندی شهرینده یئرلشدیریلمیش روسون 366-جی موتوآتیجی آلایینین زیرئهلی تئکنیکاسی و حربی هئیتی‌نین کؤمکلیگی ایله خوجا‌لی شهرینه هوجوم ائده‌رک، شهری هر طرفدن محاصره‌یه آلدی‌لار. ائرمنی‌لر آخشام چاغیندان شهری توپلاردان و آغیر زیرئهلی تئکنیکا‌دان شدتلی آتشه توتدولار. هر طرفدن محاصره یه آلینمیش دینج اها‌لی، اوشاق‌لار، قادین‌لار، یاشلی‌لارین بیر حیسه‌سی ائرمنی‌لرین آتشی نتیجه‌سینده قتل عام ائدیلدی. فئورالین 26-ی سحر ساعت 5-ده شهر تام آلووا بورونموش‌دور. بئله بیر وضعیتده، ائرمنی احاطه‌سینده قالمیش شهرده تقریباً 2500 نفر اها‌لی یاخین‌لیقداکی آغدام رایونونون مرکزینه چاتماق اومیدی ایله شهری ترک ائتمه‌یه مجبور اولموش‌دور. آنجاق شهری یئرله یئکسان ائتمیش ائرمنی قوشونو و روس موتو آتیجی آلایین حربچی‌لری دینج اها‌لییه دیوان توتدوب، اونلاری قدّارلیقلا سویقیریما معروض قویموش‌لار.
آزربایجانین قدیم خوجا‌لی شهرینده تؤره‌دیلن بو سویقیریمی نتیجه‌سینده رسمی رقملره گؤره، 63 نفری اوشاق، 106 نفری قادین، 70 نفری ایسه قوجا اولماقلا 613 نفر قدّارلیقلا قتل عام ائدیلدی. 8 عائله تامامیله محو ائدیلمیشدی. بوندان علاوه، 1275 نفر اسیر گؤتورولدو، 150 نفرین تالعیی ایندییه کیمی نامعلوم‌دور. بو سویقیریمی زامانی مولکی اینسان‌لار، او جمله‌دن قادین‌لار و اوشاق‌لار خصوصی قدّارلیق و آمانسیزلیقلا قتله یئتیریلمیش، باشلاری کسیلمیش، یاخود باشلارینین دریسی سویولموش، گؤزلری چیخاریلمیش، حامیله قادین‌لار سونگو ایله دلیک-دئشیک ائدیلمیشدی، قارین‌لارینی کسیب کؤرپه‌لرینی بئله اؤلدورموش‌لر. خسارت آلانلاردان 487 نفری شیکست اولموش‌دور کی، اونلاردان 76 نفری آزیاشلی ایدی.
ائرمنی‌لرین روسلارین ماشاسی کیمی آذربایجان تورک میللتینه قارشی سویقیریم سیاستی تاریخی آذربایجان تورپاق‌لاری حسابینا اویدورما “بؤیوک ائرمنیستان” ایدئیاسینی حیاتا کئچیرمک مقصدیله ایکی یوز ایلدن بری داوام ائدیر و 1905-1906، 1918-1920، 1948-1853، 1988-1993-جو ایللرده بو سویقیرم سیاستی نتیجه‌سینده یوز مین‌لرله گوناه‌سیز آذربایجانلی سویقیریمین قوربانی اولموش‌دور. 1918-جی ایلده تکجه گونئی آزربایجانین غرب بؤلگه‌سینده- اورمیا، سالماس و خوی اراضی‌لرینده ائرمنی‌لر رسمی استاتیستیکایا گؤره 200 مین آذربایجان تورکونو سویقیریملا محو ائتمیش‌لر.
بو گون ده روسلارین دیکته‌سی ایله ائرمنی‌لرین آذربایجان تورک‌لرینه قارشی سویقیریمی و ایشغال سیاستی‌نین داوام ائتمه‌سینی گؤرمکده ییک. صیرف روسون موداخیله‌سی ایله 44 گونلوک ایکینجی قاراباغ محاربه‌سینده یئنه ده خوجا‌لی ائرمنی اسیرلیگینده قالدی. گونئی آذربایجان دئموکراتیک تورک بیرلیگی (گادتب) آذربایجان دؤولتی و تورک میللتی‌نین منافعیی ایستیقامتینده آذربایجان تورکلری‌نین سویقیریمینین دونیا سویه‌سینده تانیدیلماسی اوچون الیندن گله نی ائدیر و آذربایجان تورک میللتینی ده بو ایستیقامتده فعال اولماغا چاغیریر.
اژدر تاغیزاده
گونئی آذربایجان دئموکراتیک تورک بیرلیگی (گادتب) باشقانی
