ادتاج اتحادیه دمکراتیک ترک آذربایجان جنوبی
گادتب: 19-جو عصرده روسیا-قاجار محاربهلری آذربایجان تاریخی اوچون فاجعهلرین باشلانغیجی اولموشدو. بو فاجعهنین سببی روسیانین آذربایجانا قارشی ایشغالچیلیق سیاستی ایدی. همین دؤورده جنوبی قافقازی، او جملهدن آذربایجانی ایشغال ائتمهیه چالیشان روسیا ایمپئریاسی ایله بؤلگه نی ایشغالدان قوروماغا چالیشان قاجارلار آراسیندا اوزون سورن محاربهلر دؤورو باشلاندی. اصلینده همین دؤورده روسیایا قارشی مباریزه آپاران عباس میرزهنین رهبرلیک ائتدیگی آذربایجان اولموشدور.
هله آغامحمد شاهین گؤستریشی ایله ولیعهد سئچیلن آذربایجان والیسی عباس میرزه آذربایجان تورپاقلارینی ایتیرمه مک اوچون الیندن گلنی ائتسه ده، فارس، ائرمنی و خاین عنصورلرین خیانتی نتیجهسینده روسیا ایمپئریاسینا یئنیلدی. ایلک اؤنجه گولوستان مقاویلهسیله، داها سونرا ایسه 10 فئورال 1828-جی ایلده محاربهنین ایکینجی دؤورونون باشا چاتماسی ایله نتیجهلنن تورکمنچای مقاویلهسی ایله آذربایجان تورپاقلاری ایکی حیسهیه بؤلوندو. آزربایجانین قوزئیی روسیا ایشغالی آلتینا کئچدی، گونئیی ایسه آذربایجان-تورک اصیللی قاجارلار سولالهسینین ایدارهسی آلتیندا قالدی.
آذربایجان اراضیسینین پارچالانماسی آذربایجان تورک میللتینه پارچالانمیش میللت طالعیی یاشاتدی. بئلهلیکله آزربایجانین فاجعهلری باشلاندی. تورکمنچای مقاویلهسینین 15-جی مادهسینه اساسلانان روسیا ایشغال اولونموش آذربایجان تورپاقلارینا، خصوصاً قاراباغین داغلیق بؤلگهلرینه، ائلهجه ده کئچمیش ایروان و ناخچیوان خانلیقلارینین اراضیسینه کوتلوی صورتده ائرمنیلری کؤچوردو. همین دؤوردن آذربایجان اراضیلرینده آذربایجان تورک میللتینه قارشی سویقیریملار، فلاکتلر دؤورو باشلادی. آذربایجان تورپاقلاری حسابینا روسون الیله ائرمنی دؤولتی یارادیلدی. بو فلاکتین باشلیجا سببکاری روسلار اولموشدور و بو گون ده آزربایجانین ایشغال ائدیلمیش تورپاقلارینین آزاد ائدیلمهسینه یئنه ده روسیا و ایران مانع اولماغا چالیشیر.
روسیا آزربایجانین قوزئی حیسهسینی ایشغال ائتدیکدن سونرا آذربایجان-تورک دؤولتی اولان قاجارلارا قارشی روسیانین و غرب ایمپئریالیستلرینین فیتنه کارلیغی داوام ائتدی و نهایت اونلارین کمکی ایله رضا خان چئوریلیش ائتدی و آزربایجانین گونئیی ده فارس اسارتینه سالیندی. آرتیق آذربایجان و آذربایجان تورک میللتی پارچالانمیش اؤلکه و پارچالانمیش میللت کیمی گونوموزده بو فاجعه نی یاشاماقدادیر. گونئی آذربایجان دئموکراتیک تورک بیرلیگی (گادتب) بو فاجعهنین سونا چاتماسینین تکجه یولونون گونئی آزربایجانین موستقیللیگینی الده ائتمهسی و بوتؤو آزربایجانین یارانماسیندا گؤرور.
اژدر تاغیزاده
گونئی آذربایجان دموکراتیک تورک بیرلیگی (گادتب) باشقانی
