ادتاج اتحادیه دمکراتیک ترک آذربایجان جنوبی
گادتب: 21 فئورال بین الخالق آنا دیلی گونودور. 1999-جو ایلین نویابریندا بیرلشمیش میللت لر تشکیلاتی بنگلادش سفیرینین تشبثو ایله فئورالین 21-نی بین الخالق آنا دیلی گونو اعلان ائدیب. بو گونون آنا دیلی گونو کیمی اعلانی 1952-جی ایل فئورالین 21-ده بنگلادشین بنگال شهرینده اؤز آنا دیلی‌نین رسمی دیل اولماسی اوغروندا مباریزه آپاران 4 اؤیرنجی‌نین اؤلدورولمه‌سی حادثه‌سی ایله باغلی‌دیر.
ایشغالچی فارس رئژیم ایسه گونئی آذربایجاندا اؤز دیلی و وارلیغینین قورونوب ساخلانیلماسی اوچون اونلارلا آذربایجان تورکونو شهید ائدیب، مینلرله آذربایجانلینی حبس و ایشگنجه‌لره معروض قویموش و قویماقدا‌دیر. لاکین تایی-برابری گؤرونمه میش بو ظلم آذربایجان تورک میللتی‌نین ایراده‌سینی سیندیرا بیلمه‌ییب. سون گونلرده یوز میندن چوخ آذربایجانلی گنجین تبریزده گونئی آذربایجانین موستقیللیگی و اؤز موقدّراتینی تعین ین آذربایجان میللتی‌نین حقوقو اولدوغونا دایر پلاکارد قالدیریب، “آذربایجان بیر اولسون، مرکزی تبریز اولسون” و “تورک دیلینده مدر‌سه، اولما‌لی‌دیر هرکسه” شعاری سسلندیرمه‌لری بونا ثبوتدور. البته آذربایجان تورک میللتی‌نین اؤولادلارینین “تورک دیلینده مدر‌سه، اولما‌لی‌دیر هرکسه” شعاری سسلندیرمه‌لریندن مقصدی رئژیمین اونسوز دا عمل ائتمه دیگی اؤز کونستیتوسیاسینین 15-جی ماده‌سی دئییل، موستقیل آذربایجان دؤولتینده اؤز دیللرینده تحصیل آلماق حاقی‌دیر. چونکی، گرچک آنلامدا آنا دیلی‌نین قورونماسی ساده‌جه اونون سیاسی جغرافیا و موستقیل دؤولتی اولدوغو تقدیرده مومکوندور.
دیل اینسان حیاتیندا ان اؤنملی یئره مالیک اولدوغو اوچون بین الخالق حقوق، کونوئنسیا‌لار و اؤزل‌لیکله 1948-جی ایلده قبول ائدیلن اینسان حاقلاری کونوئنسیاسیندا واز کئچیلمز بیر حاق کیمی تثبیت ائدیلمیش‌دیر. لاکین گونئی آذربایجانین ایشغالچی و ایرقچی فارس رئژیمی طرفین‌دن ایشغا‌لی نتیجه‌سینده میللتیمیزین تکجه دیل حقوق پوزولمور، بلکه بوتون حقوقلاری پوزولور، یئرآلتی ثروتلری تالانیر، اکولوگیاسی و تاریخی عابده‌لری محو ائدیلیر. آذربایجان تورک میللتی‌نین آرتیق تک یولو وار، او دا موستقیللیک‌دیر.
اژدر تاغی زاده
گونئی آذربایجان دموکراتیک تورک بیرلیگی (گادتب) باشقانی
