ادتاج اتحادیه دمکراتیک ترک آذربایجان جنوبی
گادتب: فئورالین 25-ده ائرمنی سلاحلی قوشونو سووئت دؤورونده خانکندی شهرینده یئرلشدیریلمیش 366-جی موتو آتیجی آلایینین زیرئهلی تئکنیکاسی و حربی هئیتی‌نین کؤمکلیگی ایله خوجا‌لی شهرینه هجوم ائده‌رک، شهری هر طرفدن محاصره‌یه آلدیلار. ائرمنیلر آخشام چاغیندان شهری توپلاردان و آغیر زیرئهلی تئکنیکا‌دان شدتلی آتشه توتدولار. هر طرفدن محاصره آلینمیش دینج اها‌لی، اوشاقلار، قادینلار، یاشلیلارین بیر حیسه‌سی ائرمنیلرین آتشی نتیجه‌سینده قتل عام ائدیلدی. فئورالین 26-ی سحر ساعات 5-ده شهر تام آلووا بورونموشدور. بئله بیر وضعیتده، ائرمنی احاته‌سینده اولان شهرده قالمیش تقریباً 2500 نفر اها‌لی یاخینلیق‌داکی آغدام رایونونون مرکزینه چاتماق اومیدی ایله شهری ترک ائتمه‌یه مجبور اولموشدور. آنجاق شهری یئرله یئکسان ائتمیش ائرمنی سلاحلی قوشونو و روس موتو آتیجی آلایین حربچی‌لری دینج اها‌لییه دیوان توتدوب، اونلاری قدّارلیقلا سویقیریما معروض قویموش‌لار.
آذربایجانین قدیم خوجا‌لی شهرینده حیاتا کئچیریلن بو سویقیریمی نتیجه‌سینده رسمی رقملره گؤره، 613 نفر اؤلدورولدو کی، اونلاردان 63 نفری اوشاق، 106 نفری قادین، 70 نفری ایسه قوجا ایدی. 8 عائله تامامیله محو ائدیلمیشدی. بوندان علاوه، 1275 نفر اسیر گؤتورولدو، 150 نفرین طالعی ایندییه کیمی نامعلومدور. بو سویقیریمی زامانی مولکی اینسانلار، او جمله‌دن قادینلار و اوشاقلار خصوصی قدّارلیق و آمانسیزلیقلا قتله یئتیریلمیش، باشلاری کسیلمیش، یاخود باشلارینین دری‌سی سویولموش، گؤزلری چیخاریلمیش، حامیله قادین‌ار سونگو ایله دلیک-دئشیک ائدیلمیشدی. خسارت آلانلاردان 487 نفری شیکست اولموشدور کی، اونلاردان 76 نفری آزیاشلی ایدی.
ائرمنیلرین آذربایجان تورک میللتینه قارشی سویقیریم سیاستی تاریخی آذربایجان تورپاق‌لاری حسابینا اویدورما “بؤیوک ائرمنیستان” ایدئیاسینی حیاتا کئچیرمک مقصدیله ایکی یوز ایلدن چوخ بیر مدتدیر داوام ائدیر و 1905-1906، 1918-1920، 1948-1853، 1988-1993-جو ایللرده بو سویقیرم سیاستی نتیجه‌سینده یوز مین‌لرله گوناه‌سیز آذربایجانلی سویقیریمین قوربانی اولموشدور. 1918-جی ایلده تکجه گونئی آزربایجانین غرب بؤلگه‌سینده- اورمیا، سالماس و خوی اراضی‌لرینده ائرمنیلر رسمی ایستاتیستیکایا گؤره 200 مین آذربایجان تورکونو سویقیریملا محو ائتمیشلر.
ائرمنیلرین آذربایجان تورک‌لرینه قارشی سویقیریمی و ایشغال سیاستی‌نین گونوموزده ده داوام ائتمه‌سینی نظره آلان گونئی آذربایجان دموکراتیک تورک بیرلیگی (گادتب) آذربایجان دؤولتی و تورک میللتی‌نین منافعیی ایستیقامتینده آذربایجان تورک‌لری‌نین سویقیریمینین دونیا سویه‌سینده تانیدیلماسی اوچون الین‌دن گله نی ائدیر و آذربایجان تورک میللتینی ده بو ایستیقامتده فعال اولماغا چاغیریر.
اژدر تاغی‌زاده
گونئی آذربایجان دموکراتیک تورک بیرلیگی‌نین (گادتب) باشقانی
