ادتاج اتحادیه دمکراتیک ترک آذربایجان جنوبی
گادتب: هر اینسانین اؤزونه عایید اؤزللیگی وار، بو اؤزللیکلرین بیر سیراسینا کیملیک آدینی وئریریک. سوی، دوغولدوغو توپراق، آنا دیل ان اؤزل تانینان وارلیقلارداندیر. بونلاری قازانماق اولماز بلکه بو دونیایا گلمه دن اؤنجه بیر اینسانا پای وئریلیر. کیمسه آتا آناسینی دئییشنمز، دوغولدوغو توپراغی دانانماز، سویونو چئویره بیلمز و او اوزدن بونلارا کیملیک دئییلیر و بونلار اؤلومه قدر وار اولاجاق. بئله لیکله، هر کسین بونلارا اؤنم وئرمه سی و عئینی حالدا سایقییلا یاناشماسی گرکیر.
بو دوروم ایران آدلی اؤلکه ده یالنیز فارس ائتنیکینه عاییددیر و باشقا میللت لر و ائتنیک لرین وارلیقلاری حکومت و سانترالیزم فارس سیستم طرفیندن تاپدالانیب و آشاغلانماقدادیر.
پهلوی دؤنمیندن باشلانان آیری سئچکیلیک و فارسچیلیغی اوستون گؤرن، ایسلام جمهوریتینده ده داوام ائدرک، داها آرتیق و آغیر وضعیت ده دیر. ائله کی اؤز دیلینده یازیب اوخوماق ایسته ین لرین پایی ایشکنجه، مالی جزا، و توتساق اولاراق، غیرفارس میللت لرین دیللری یاساقلانیب، میللی موسیقی، رقص و کولتوروموز خور گؤرونور، غیرمرکزی بؤلگه لرین ائکونومی دورومو گئت گئده آغیر دوروما دؤنه رک، میللت لر مرکزه دوغرو سورگون اولوبلار.
بو تورلو آلچاق ایشلری مئدیالاریندا، قزئته لرینده و اوخول کیتابلاریندا گؤرمک اولور، آنجاق آلچاتما سوییه نی او قدر ائندیریبلر کی غیرفارس میللت لره قارشی جوک چیخاردیب و کیتاب کیمی باسدیراراق، یاییملاییبلار.
ایران یاسالاریندا یئر آلان ائتنیک لره توهین سوچ ساییلاراق، اوستده کی یاییملانان کیتابین یازاری، اونا ایزین وئرن هر کسی سوچلو تانییاراق محکمه یه چکمک اولار، آنجاق سانترالیزم سیستم، فاشیست بیر حکومت و انسانلیغا قارشی بیر دئولت دن و یارقی سیستمیندن آنجاق غیرفارس میللت لره قارشی یارقیلامالار اولور و اونون اؤرنه یی یوزلرجه غیرفارس میللی فعالین حاقسیز یئره توتساقلانیب، جزالانمالاریدیر.
مولانا دئمیشکن: کز دیو و دد ملولم و انسانم آرزوست.
بیزه دوشن پای: بونلارا قارشی دیم دیک دوروب، اؤز کیملیگیمیزه، دیلیمیزه، کولتوروموزه و بیزه عایید اولان هر نه یی ییه له نیب (صاحیب)، باشاردیقجا و داها دوغروسو کسینلیکله اؤز دیلیمیزده یازیب، اوخویوب و اؤیره نیب و اؤیرتمه لی ییک.
