یعقوب رمضانی: کیملر، نه اوچون آزربایجان آدینی سیلمک ایسته ییرلر؟

گادتب: اوشاقکن دهقان فداکار آدلی گرچک بیر اؤیکونو (داستان) اوخولدا اوخوماقدان دویغولانیب، فخر ساتاردیق، چونکو بیر آزربایجانلی بئلنچی بؤیوک ایشی باشارا بیلمیش. اوخودوغوموز باشقا اؤیکولر یا خیالیمیش یادا اؤزگه میللت لره باغلی.

کئچن گونلرده همن اؤیکونو ایکی دئییشیک له گؤردوم، بیرینجی سی، اوستونه پالتار گئییلن ریزعلی خواجوی و ایکینجی سی، آزربایجان آدی نین اؤیکودن سیلینمه سی. اؤنجه شاشیردیم، سونرا کئچمیشده اولان عینی اویونلاری گؤز اؤنومه سردییمده، شاشیرماغا یئر قالمادی. مگر بوندان اؤنجه آزربایجان آدینی اردبیل، زنگان، قزوین، آستارا، انزلی و … دن سیلمه ییب لر؟ مگر باتی آزربایجانی ارومیه اوستانی کیمی تانیتدیرماغا چالیشمیرلار؟ مگر آذربایجان شرقی و غربی نی، آذ شرقی و غربی یازمیرلار؟ بس نه اوچون اوخول کیتابیندان سیلینمه سینه بو قدر اوزولک؟

درین باخیلیرسا، ایران حاکمیتی، آپاردیغی گئنیش و آچیق پیلانلا، آزربایجان آدینی کاغیذلاردان یوخ، بئیین لردن سیلمک ایسته ییر.

کیملر بو ایشی پیلانلاییب و یورودور، آچیق و آیدین دیر. ایرانشهری آدلی دوشونجه، پانفارسیسم و سانترالیزم بیر سیستم، چالیشیر بؤیوک گوجو، تاریخی، دیلی، کولتوره صاحیب اولان میللتی و ائتنیکی آرادان آپارسین و ایلک آتدیم دا، تورک میللتین آذری آدلاندیریب، سونرا توپراقلارینی پارچالاییب، دیلینی، کولتورونو، تاریخی نی، کیملیگینی و ها بئله آتا بابالاریمیزدان قالان میراث لاریمیزی یوخ ائدیب و ائتمکده دیلر. اورمو گؤلونو قورودوب، مئشه لریمیزی یوخ ائدیرلر، یئر آلتی معدن لریمیزی تاراج ائدیرلر، ایش سیزلیک اورانی یوکسلده رک، تورک میللتی نی مرکزی شهرلره کؤچ ائتمه یه مجبور ائدیب و ائدرک، آسمیلاسیون پیلانی نی راحاتجاسینا یورودورلر. اوتای آزربایجانی، دولت باکو، علیف، ایران شمالی و آران آدلاندیراراق، قوزئی آزربایجانی گؤرمزدن گلیرلر.

تبعیض لر، ظولم لر، گؤرمزدن گلمه لر و آششاغلاماقلاردان یازیلیرسا یوزلرجه کیتاب یارانار، آنجاق مرکزی حکومت، ایستر پهلوی اولسون ایستر اسلام حاکمیتی، ایستر پوزیسیون اولسون ایستر اوپوزسیون، آنجاق بیر اورتاق دوشونجه یه صاحیب دیلر و اودا آزربایجان دان بوتونلوکله آیریلیب، تورک میللتی نی و آزربایجانی یوخ ائتمک. اونلار اینانیب لار آزربایجان دان آیریلماغی، آنجاق بیز هله لیک اونا اینانمامیشیق. اونلار چالیشیرلار یوخ ائتمه یه، آنجاق آزربایجان وارمیش، وار و هر زامان اولاجاق. بیز بیرلیکده بو سلوقانی دفعه لرجه دیله گتیرمیشیک:

آزربایجان وار اولسون – ایستمه ین کور اولسون