ادتاج اتحادیه دمکراتیک ترک آذربایجان جنوبی
گادتب: بؤیوک ایمپئراتورلوقلار قوران آذربایجان تورک میللتی ۱۹۲۵-جی ایلدن سونرا دونیا ایمپئریالیزمینین فیتنه کارلیغی اوزوندن فارس اسارتینه سالینمیشدیر. بو اسارت و ایشغالا سون قویماق اوغروندا ۱۹۴۵-جی ایل ۲۱ آذر-ده قورولان آذربایجان میللی حکومتی ده مین ایللر بویو بؤیوک ایمپئراتورلوقلار قوران آذربایجان تورک میللتینین گونئی آذربایجانین معاصر دؤور دؤولتچیلیک مودئلینه کئچید حساب ائدیلیر. بو مقدس یولدا میللی حکومتی قوران سید جعفر پیشه وری دئییردی: «اؤلدو وار دؤندو یوخدور». آذربایجان میللی حکومتینین هر طرفدن شووینیست و جینایتکار فارس رئژیمی و اونون حمایهچیلرینین تضییقی و هوجومو نتیجهسینده سوقوطوندان سونرا آذربایجانین دوشمنلری بو سؤزو لاغا قویاراق، «اؤلدو ده وار ایمیش دؤندو ده» دئییردیلر. لاکین باشا دوشموردولر کی، پیشه وری بو سؤزو تکجه او دؤنم اوچون یوخ، بو گون اوچون ده دئییرمیش. بو حرکات داوام ائدیر و آذربایجان تورک میللتی اؤز موستقیللیگینی الده ائتمه ینه دک مباریزهدن ال چکمهیهجک.
اونوتماماق لازیمدیر کی، ۲۱ آذر حرکاتی صینفی مباریزه یوخ، میللی حرکات ایدی. حرکاتین باشچیسی سید جعفر پیشه وری دفعهلرله تکرار ائدیردی کی، بو حرکات صینفی حرکات یوخ، میللی حرکاتدیر و آذربایجان تورکلری بیر-بیرینه قارشی مجادیله آپارمیرلار. اونلار فارس شووینیزمینه قارشی مباریزه آپاریب، آذربایجان تورکجهسینده مکتب، اونیوئرسیتئت، مطبوعات و رادیونون آچیلماسینا چالیشیرلار و بونو دا ائتمیشدیلر.
۲۱ آذر حرکاتی و میللی حکومتین قورولماسی ایله گونئی آذربایجانا یئنی روح گلدی. آزاد مطبوعات، فیکیر آزادلیغی و عمومیتله آذربایجانا آزادلیق گلدی. بو دا ایرقچی و ایرتیجاچی فارس شووینیزمینی، ائلهجه ده اونلاری دستکلهییب حاکمیته گتیرهن باشدا اینگیلتره اولماقلا دونیا موستملکهچیلرینی قورخویا سالدی. بئله کی، دونیا موستملکهچیلری موسکوا کونفرانسیندا آذربایجانین مختاریت قازانماسینا بئله ایجازه وئرمهدیلر. بونون آردیندان ایسه تهران رئژیمی بوتون آنلاشمالارا رغماً آذربایجانا هوجوما کئچیب، آذربایجان تورکلرینه قارشی دهشتلی سویقیریم تؤرتدی.
البته سید جعفر پیشه وری بهانهلرین بیردفعهلیک اورتادان قالخماسی اوچون دئموکراتییا، مختاریت، فئدئرالیزم و پارلامئنتاریزمی ده یوخلادی. لاکین تهرانین ایرتیجاچی-شووینیست فارس رئژیمی و اونون حیمایه دارلاری گؤستردیلر کی، بو بؤلگهده و قوندارما ایران آدی آلتیندا اولان اراضیده آذربایجان تورک میللتینه هئچ زامان اؤز مدنی و اینسانی حقوقلارینا چاتماغا ایجازه وئرمهیهجکلر. ۲۱ آذر حرکاتینین باشلانغیجی و فاجعه وی سونو دا گؤستردی کی، آذربایجان تورک میللتی یالنیز اؤزونه گووهنمهلیدیر. میللت اؤزونه گوونیب، ایرادهسینی سرگیلهسه هئچ بیر ایمپئرییانین حمایهسینه ده محتاج اولماز. بیز اؤز میللتیمیزه گووهنیریک. بیزیم لیدئرلریمیز محمد امین رسولزاده، پیشه وری، ابولفضل ائلچیبی و آتاتورک ده گؤستردی کی، گوج تورک میللتیندهدیر. آذربایجان تورک میللتی ایراده اورتایا قویاندا اؤز مجلیسینی، اؤز دؤولتینی و اؤز اوردوسونو یارادیر. سرحدلرینه، سینیرلارینا اؤزو صاحب چیخیر. بو گون ۲۱ آذر حرکاتینین عنعنهسینه دایاناراق، آذربایجانین گونئیینین تکجه بیر یولو قالیب. او دا اؤز ایستیقلالینی الده ائدیب و آذربایجانین موستقیل دؤولتینی یاراتماقدیر. سون ایللرین تجروبهسی گؤستریب کی، هئچ بیر حالدا ایرقچی فارس رئژیمی آذربایجان تورک میللتینین وارلیغینی تانیماق ایسته میر. ایندی ایسه ایرقچی فارس-موللا رئژیمین کونجه سیخیلدیغی و سورییادا دا مغلوبیته اوغراماسی رئژیمین سونونون گلدییندن و آذربایجان تورک میللتینین موستقیللیک مباریزهسینده یئنی مرحلهنین آچیلدیغیندان خبر وئریر. موللا رئژیمی میلیاردلار خرجهلهمکله بشار اسدی ایللرله قورودو، لاکین سوندا ایفلاسا اوغرادی. بو ایسه هم ده آذربایجان تورک میللتینین غلبهسیدیر و میللتیمیز داها روح یوکسکلیگی ایله اؤز موستقیللیگی اوغروندا چالیشیب و بو غلبهنین چوخ یاخیندا اولماسینا اینانمالیدیر.
گونئی آذربایجان دئموکراتیک تورک بیرلیگی (گادتب) آذربایجان تورک میللتینی ایرقچی فارس-موللا رئژیمین سورییادا و بؤلگهده مغلوبیتیندن سونرا یارانان وضعیتی دوزگون دگرلندیریب گونئی آذربایجاندا میللی دؤولتچیلیگین برپاسی اوغروندا بیرلشمهیه و آذربایجانین موستقیللیگینی برپا ائتمکده داها عزمله مباریزه آپارماغا چاغیریر. کیمسهیه سیرر دئییل کی، گونئی آذربایجانین یئگانه قورتولوش یولو ایستیقلالدیر و بو گون بوتون میللی قوهلر و میللتیمیز بوتون گوجونو بو ایستیقامتده بیرلشدیرمهلیدیر..
اژدر تاغیزاده
گونئی آذربایجان دئموکراتیک تورک بیرلیگی (گادتب) باشقانی
