ادتاج اتحادیه دمکراتیک ترک آذربایجان جنوبی
گادتب: اؤن سوز – اوستاد “گنجعلی صباحی” معاصر آزربايجان ادبياتی نين نثر ساحه‌سينده ان گؤركملی يازيچی لاردان بيری دير.
ادبياتچی‌لار صباحی نی آزربايجان نثری نين آتاسی كيمی ساييرلار.
بو يازيچی حئكايه يازاری اولدوغو حالدا ، گوجلو و باجاريقلی بير ادبيات شناس ايدی.
اونون ادبی تنقيدی مقاله‌لری مختلف درگی لرده ياييلميشدير.
صباحی نين اثرلريندن كنار اؤز ياشاييشی دا ان ماراق چئكن بير قونودور.
سيبری ياخينلارينداكی قازاغيستاندا يادا ايرانين لرستان بؤلگه سينده كی سورگونلوک احوالاتی چوخ تاثير ائديجی بير احوالات دير.
بيوگرافی : بو اوستادين ياشاييش حئكايه‌سی نی ييغجام شكيلده ، يازارين اؤتن گونلريم اثريندن يارديم آلاراق ايللر سيراسی ايله بؤيله سينه گتيرمک اولار :
1285 _ مرند شهری‌نين ياخينليغيندا يئرله‌شن “مياب” كندينده آنادان اولور.
1292 _ يئددی ياشيی ايكن عائيله سی ايله برابر آتاسی نين يانينا گئتمک مقصدی ايله اوتای آزربايجانا كئچيب “گئده بی” شهرينده يئرله‌شيرلر.
قارداشی “صمد” ائله بو ايلده دونيايا گلير.
(سونرالار صمد آدليم بير تئاترچی و فيلم رئجيسورو اولور).
ائله همان ايل بيرينجی دونيا محاربه سی باشلانير و گنجعلی گيل آنينفيلد ( اينديكی شامخور ) شهرينه كؤچورلر.
1296 _ روسيه ده اينقلاب اولور و بو اينقلاب اؤز تاثيرينی آزربايجانليی لارا هابئله گنجعلی كيمی اينسانلارا دا بوراخير.
ايكی ايل بوندان سونرا شورالار حكومتی قورولور.
1300 _ آناسی روماتيزم دردينه دوچار اولوب ال آياقدان دوشور.
آتاسی آناسی دولانيشيق لارينی نجات وئرمک اوچون گنجعلی نی 15 ياشيندا ائولنديريرلر.
بو ايلدن بری اونون حيات يولداشی “حبيبه” گنجعلی نين ائنيش_يوققوشلو ياشاييشينا داخل اولور.
1303 _ گنجه شهرينه كؤچوب يئنی آچيلميش عمله فاكولته‌سی_ينه داخل اولوب تحصيلينی داوام ائتديرير.
1308 _ اورتا مكتبی قورتاريب باكی‌دا پئداقوژی انستيتوتونون ديل و ادبيات شعبه سينه داخل اولور.
1310 _ معلم صفتينده گئده‌بی‌گيه گئدير.
اوردا مكتبين مديری تعيين اولونور.
1312 _ شامخورا يوللانيب مكتب ايشينده چاليشمالارينی آرتديرير.
1316 _ روسيه وطنداشليغی پاسپورتو اولمايان شخص‌لر ، خصوصی ايله ايران تبعه‌لری اونلار ايچينده صباحی و آتاسی دا توتولوب زيندانا دوشورلر .
ائله بو ايل آتاسی اؤلور.
1317 _ اييرمی ايكی آی زينداندان سونرا عائيله‌سی ايله برابر قازاغاستانين سيبری يه قوووشان شمال بؤلگه‌سينه سورگون يوللانير.
1321 _ بئش ايل تبعيد سوره‌سينی قورتارسادا ايكينجی دونيا محاربه سی نين قيزغين چاغلارینا دوشوب اوچ ايل داها قازاغيستاندا قالماغا مجبور قالير.
1324 _ ايكينجی دونيا محاربه‌سی قورتارير. گنجعلی عائيله‌سی ايله برابر آزربایجانا ( شامخورا) قاييدير.
1325 – باهار چاغيندا قيرخ ايلدن سونرا وطن تورپاغينا تبريزه قاييدير.
بو زامان آزربايجاندا پيشه‌وری نين حكومتی قورولوبدور.
تبريز راديوسوندا ايشله‌مه‌يه باشلير.
ميللی حكومت سقوط ائديب گنجعلی ده باشقالاری كيمی زيندانا دوشور.
1326 _ لرستان‌ين بدرآباد كندينه سونرا دا الشتر شهرينه سورگون گؤنده‌ريلير.
بوردا مختلف ايشلره باشلایير.
عكاسليق حرفه‌سينی بوردا اؤزونه سئچير.
1328 _ تبريزه قاييدير.
1329 _ تبريزده امنيت مامورلاری طرفيندن باسقی آلتيندا قاليب تهرانا كؤچمه‌يه مجبور اولور.
1331 _ خائين عنوان حئكايه‌سی ، ايلک دونه چلنگر درگيی سی نين سون اوچ ساييندا چاپ ائديلير.
همان ايل “اؤتن گونلريم” اثری نين اساس بؤلومونو تهراندا يازير.
1341 _ حيات يولداشی ، ايللر بويو سيرداشی اولان “حبيبه” وفات ائدير.
1343 _ “قارتال” آديندا اولان حئكايه توپلوسو چاپ اولونور.
1345 _ عيديه خانيم لا تانيش اولوب يئنی بير حيات قورور.
1347 _ شاعير بولود_قاراچورلو واسيطه‌سی ايله بير تجارتخانادا ايشه باشلير.
1357 _ قارداشی صمد دونياسی نی دييشير.
بو ایللرده مختلف تازا يارانميش درگی لرله امكداشليق ائدير.
1358 _ دوستو بولود_قاراچورلو وفات ائدير و داها چوخ یالنیزلاشیر.
1360 _ “شعريميز زامانلا آديملايير” عنوانلی اثری چاپ اولونور.
1368 _ شهريور آيی نين 15_ينده 83 ياشيندايكن دونياسی نی دييشيب ابديته قوووشور.
1372 _ “اؤتن گونلريم” آديندا اوتوبيوگرافی سی “عزيز محسنی” مقدمه‌سی ايله چاپ اولونور.
1383 _ مهر آيی‌نين 17_سينده تهرانين بهمن آدلی مدنيت ساراييندا ، صباحی آدينا آغيرلاما مراسيمی قورولور.
گنجعلی صباحی نین اثرلری :
گنجعلی صباحی نين دؤرد اثری ايندی يه دک چاپ اولونوب.
بو يازارين چوخلو اثرلری هله ده ايشيق اؤزو گؤرمه ييبلر.
ياييملانان اثرلری بونلاردان عيبارتدير : حیات فاجعه لریندن : بو اثر بیر کپحئکتیه توپلوسودور.
ایچینده کی حئکایه لر :
1 – حیات فاجعه لریندن
2 – خائن
3 -اووچو
4 – شرفلی اؤلوم
قارتال : بو حئکایه توپلوسونا دا 9 حئکایه داخیل ائدیلمیشدیر :
1 – قارتال
2 – قوجالیقدا یورغالیق
3 – گول دسته سی
4 – آنا قلبی
5 – عارسیز قافار
6 – کئفلی
7 – اوز آرامیزدا قالسین
8 – حایات آجیلیقلاریندان
9 – اوشاق اوسته ساواش
شعریمیز زمانلا آدیملاییر : بو کیتاب 1360_جی ایل تهراندا اولان نشر دونیا نشری واسطه سی ایله شهریور آییندا گون ایشیغینا چیخا بیلمیشدیر.
شعریمیز زمانلا آددیملاییر کیتابینین یازی لارین بئله سیرالاماق مومکون دور :
1 – شعریمیز زمانلا آددیم لاییر
2 – خلق شاعیری سهند
3 – ادبیاتین اجتماعی حیاتیندا تاثیری
4 – خلق شاعیری ساهرین یارادیجیلیغینا بیر باخیش
5 -محزونون حیات و یارادیجیلیغی
6 – ساز و سوز اوستادی عاشیق علی عسگر
7 – آغیر ایل‌لر و عیسی نین صون شامینا بیر نظر
8 – مبارز شاعیر ( هاشیم ترلان )
9 – خلق شاعیری سهنددن خاطیره لریم 10 – وطن و خلق محبتی
اوتن گونلریم : بو دا خالق یازیچیمیزین دئمک سون چاپ اولموش رومان سایاقلی خاطیره لری دیر کی “عزیز محسنی” نین اؤن سوزو ایله یازیچی نین وفاتیندان سونرا چاپ ایمکانی تاپابیلمیشدیر.
بو اثر ايكی دؤنه مختلف چئويرمنلر طرفيندن فارسجايا ترجومه اولونوب.
قايناق :
1 – “اوتن گونلريم” ، گنجعلی صباحی ، دنيا ياييم ائوی ، تهران ، 1372
2 – “معاصر دئموكراتيک ادبياتيميزين نثر آتاسی” ، ائلدار موغانلی ، آذری درگی‌سی ، 5_ينجی سای ، 1384
3 – ” گنجعلی صباحی گونئی آزربايجانين چاغداش نثری نين آتاسی ” ، “رضا همراز ” ين وئب سيته‌سی.
ابوذر جعفری
