ادتاج اتحادیه دمکراتیک ترک آذربایجان جنوبی
گادتب: ایلک اؤنجه اولوسلار آراسی دونیالیق آنا دیلی گونون بوتون میللتلره، اؤزللیکله اؤز دیلینده یازیب اوخویا بیلمهین میللتلره باشدا آزربایجان میللتینه قوتلو اولسون دئییرم.
بیر میللتین وار اولماسی اوچون دیل، سوی، توپراق، تؤره و اؤتم (تاریخ) فاکتورلاری لازیمدیر. بیز بیر میللت اولدوغوموز اوچون سویوموز تورک، توپراغیمیز آزربایجان و دیلیمیز تورکجه اولدوغو اوچون آزربایجان میللی حرکتینی بو اساسلار اوستونده یاراتمیشیق. آنجاق بو اوچ اساس فاکتورو قوروماغیمیز و ایلکهمیز اولاراق بونلارین اوستونده هئچ بیر تارتیشمایا یئر قویمامالیییق.
ایللر اؤنجه سیز تورک دیللیسیز، آزریسیز دیینلر، آزربایجان سیزین یوردونوز دئییلده باشقا یئرلردن کوچوب گلیبسیز دئدیلر و بونلاری کئچیب بیزیم دیلی آزری سایانلار همن دیلین یازیب اوخونماسینی بئله یاساقلاماغا باشلاییب و اؤز دیلیمیزده یازماغی تجزیه طلبلیک آدلاندیردیلار.
اگر بوگون توپراقلاریمیزدا اؤزگهلرین گؤزو وار، اگر کولتوروموزو، موسیقیمیزی، تؤرهلریمیزی قیسیتداییب، یئری گلدیگینده آششاغلاییرلار، اگر اؤز دیلیمیزده یازماغی بیزه چوخ گؤرورلر، دئمک بونلار بیزی یوخ ائتمهیه چالیشیرلار و بو ایشین قاباغینی آلماق اوچون ایلک آتدیمیمیز اؤز دیلیمیزده یازیب، اوخویوب و اوخودماغیمیزدیر. نییه #تورکجه_یازاق سلوقانین و آخیمین ندهن باشلانماسی، نه اؤزللییی و نه اوچون اؤنملی اولدوغونو آچیقلاماق ایستهییرم و اوماریم بو آخیما بوتون یازارلاریمیز قاتیلسینلار.
۱-بیر دیلین آرادان گئتمهمهسی و دیری قالماسی اوچون محتوا یاراتماق لازیم. بیلیملشدیریب و بوتون بیلیم ساحهلرده گلیشمهسی لازیم و او اوزدن هر کس اؤز اوزمانلیق ساحهسینده بو دیلده یازمالی و اوخوماسی گرکیر.
۲-نه قدر فارس دیلینده یازیلیرسا تورک دیلینه یوخ بلکه فارس دیلینه محتوا یارادیب و اوخوجولاری فارسجا اوخوماغا اویوشدوروروق.
۳-دوشمن بیزی دیلیمیزدن وورورسا او سنگری الیندن آلمالیییق. تورک دیلینده یازماقلا، دوشمنین بیزی یوخ ائتمهسینین قاباغیندا دایاناراق هزینه وئرمهدن گوجلهنیب و میللتیمیزی اؤز دیلینین اؤیرهنمهسینه زورلاییریق. کئچمیشه باخیلیرسا کوتله میللت تورکجه یازماغا و اوخوماغا، آدینی میللتچی و آیدین دوشونجهلی قویانلاردان داها مئییللیدیلر و یازیب، یارادیرلار.
۴-باشقالارین اوخونماسی اوچون اؤزونه توجیه گتیرن فارسجا یازان یولداشلارا: باشقا میللتلر بیزی تانیما یئرینه اؤز میللتیمیزی آییدیب ایناندیرساق بیزه یئتر. بیز بیزه یئتهریک.
و…
بوتون یازارلارا سسلهنیرم:گلین اؤز دیلیمیزده یازاق.
