ادتاج اتحادیه دمکراتیک ترک آذربایجان جنوبی
گادتب: 21 آذر آزربایجان دا میللی اگمنلیک (حاکمیت) گونودور. 21 آذر 1324_1945 ده آزربایجان میلتی هر بیر میللی بیلینجلی میللت کیمی میللی اگمن لییینی قورماق شرفینه نایل اولا بیلدی. اؤز میللی دؤولتچی لییینی قوروب اؤز طالعینه حاکیم اولماق میللی باخیمدان بؤیوک باشاری دیر. 21 آذر ایسه کئچن یوز ایلین ایچینده آزربایجان اوچون دؤنوش نقطه سی و غلبه نین زیروه سی کیمی حساب اولونور. بونون اوچونده 21 آذر میللت و وطنین میللی حاکمیت تملينده بیرلشمک نقطه سی اولاراق ده یرلندیریلمک ده دیر.
21 آذر یالنیز ایلده بیر گون اولاراق گؤرونمور، بو گون میللی آزادلیغین وطنیمیزده دوغولدوغو گوندور. بونون اوچونده 21 آذر آزربایجانچیلیغین و میللی گؤروش و دوشونجه نین عطف نقطه سی، دوغوم گونو و میللی بایرام دیر. 21 آذر همده تورک آزربایجان میلتینین معاصیر میللت_دؤولت دونیاسینا قدم قویدوغو و بیر میللت کیمی اؤز طالعینی تعیین ائتمک گونودور. بو گونده یارانان آزربایجان میللی حوکومتی آزربایجان میللی حاکمیتینین دموکراتیک نماینده سی اولاراق بؤیوک و شانلی میلتیمیز طرفیندن گؤره ولنیب، آزربایجان میللی منافعینی قوروماقلا وظیفه لندیریلمیشدیر.
بونون اوچونده هر بیر ویجدانلی و شعورلو وطنداشین قلبینده و ذهنینده 21 آذر استعمار و استبدادا غلبه گونو و ظفر بایرامی کیمی حک اولونوب، یاشاماقدادیر.
بونون اوچونده 21 آذر آزربایجانین بیر میلی دؤولت کیمی چاغداش دونیادا اؤزونو تانیتدیرما گونودور. میلی حؤکومتین عمرو رسمی اولاراق بیر ایل سورسه ده، 21 آذر فلسفه سی و میلی حاکمیت دوشونجه سی بوگونه قدر تورک میلتی و میلی قوه اوچون گوج قایناغی و میلی یولون گونشی کیمی اؤز وارلیغینی قورویوب و یولوموزا ایشیق ساچماقدادیر.
21 آذر فلسفه سی بیزه بیر میلت کیمی آزاد و باش اوجا یاشاماق ایسته ییرسک ،میلی حاکمیت قورماغیمیزین شرط اولدوغونو ثبوت ائتدی. بونون اوچونده 21 آذر تورک میلتینین اؤز دوغما آزربایجان وطنینده میلی سعادته گئده ن یولون باشلانیش نقطه سی دیر.
21 آذر یالنیز آزربایجان میلی حوکومتینین سیاسی اولاراق دوغوم گونو دئییل. بو گون تورک میلتینین میلی اراده سینین تجلی گونو و میلی آزادلیغین وطنیمیز و میلتیمیز اوچون تک اومید قایناغی و میلی قوه نین تک قورتاریجی گوجو اولدوغونون اثبات گونودور.
بونون اوچونده 21 آذر تکجه بیر گون یوخ، میلی سعادتیمیز اوچون بیر یول بیر دوشونجه، بیر فلسفه و تک چیخیش یولودور.
21 آذر دوشونجه سی میلتیمیزین میلی حاکمیت و میلی سعادت چئوره سینده بیرلشیب، فردی خوشبختلییین یالنیز وطن و میلت سعادتی چرچیوه سینده قالارغی اولاراق یاشاماسینی بیزه ثبوت ائدن دوشونجه نین تام مرکزی و آدرئسی دیر.
21 آذر دوشونجه سی و آماجی اولمایان بیر میلت ابدی اولاراق اسارت ایچینده و کؤله وضعیتینده بیر جمعیت کیمی سورونمه یه و محو اولماغا محکوم و مجبوردور.
چونکی 21 آذر استعمار و استبدادین علیهینه قیام و غلبه نین مومکون اولدوغونو ثبوت ائدن گوندور.
