GADTB Güney Azərbaycan Demokratik Türk Birliyi
GADTB: Dünən keçirilən oyunda “Padiyab Xəlxal” komandası turnirin ən təsirli və yaddaqalan performanslarından birinə imza atdı. Azərbaycanı layiqincə təmsil edən komanda artıq ilk hissənin əvvəlində 10 nəfərlə oynamağa məcbur qalsa da, matçın 80-ci dəqiqəsinədək möhtəşəm bir “superqol”la “İstiqlal”ı üstələdi və azarkeşlərə növbəti mərhələyə yüksəlmək ümidini yaşatdı.
Lakin matçın son dəqiqələrində hakim qərarı oyunun axarını dəyişdi. Xəlxal təmsilçilərinin və azarkeşlərin sözlərinə görə, həmin epizod fərqli şəkildə də qiymətləndirilə bilərdi. Qısa müddət ərzində verilən penalti qərarı “İstiqlal”a hesabı 1–1 etmək imkanı yaratdı. Qarşılaşma əlavə vaxtda davam etdi və “Padiyab” ikinci qolu buraxaraq oyunu 1–2 hesabı ilə məğlub başa vurdu.
Məğlubiyyətə baxmayaraq, “Padiyab Xəlxal”ın əzmkarlığı, təmiz futbolu və meydandakı cəsarətli mübarizəsi Azərbaycan azarkeşləri tərəfindən böyük rəğbətlə qarşılandı. Komanda göstərdi ki, futbolda daha çox diqqətə, dəstəyə və imkanlara layiqdir — “Padiyab” meydanı məğlub olsa da, başıuca tərk etdi.
