İran rəhbərliyində ABŞ-la danışıqlar ətrafında fikir ayrılığı iddiası

GADTB: İsrailin Channel 14 telekanalı İranın yüksək vəzifəli rəsmiləri arasında baş tutduğu iddia edilən daxili danışığın məzmununu əldə etdiyini irəli sürüb. Məlumata görə, bu danışıqda ABŞ-la mümkün danışıqlar və prezidentin səlahiyyətlərinin məhdudluğu ətrafında fikir ayrılıqları müzakirə olunub.

İddiaya əsasən, Masud Pezeşkian həmin söhbətdə ABŞ-la danışıqlarda birbaşa iştirak etmək istədiyini bildirib və razılaşmanın tez əldə olunmaması halında İran iqtisadiyyatının bir neçə həftə ərzində ciddi böhranla üzləşə biləcəyi barədə xəbərdarlıq edib.

Digər tərəfdən, Əhməd Vəhidi prezidentin danışıqlarda iştirakına qarşı çıxaraq bunun İran tərəfindən geniş güzəştlərə səbəb ola biləcəyini qeyd edib.

Hesabatda həmçinin iddia olunur ki, söhbətdən sonra prezident yaxın ətrafına vəziyyətini “girov kimi” qiymətləndirdiyini deyib, istefa vermək və ya müstəqil qərar qəbul etmək imkanının olmadığını bildirib.

Channel 14 yekunda hazırkı şəraitdə Sepah-ın ölkə idarəçiliyində əsas rol oynadığını iddia edir.

Qeyd edək ki, bu məlumatlar müstəqil mənbələr tərəfindən təsdiqlənməyib və rəsmi qurumlar tərəfindən açıqlama verilməyib.