İran rejimi türk adı Alparslana görə azərbaycanlı körpəyə doğum şəhadətnaməsi vermir

GADTB-nin Mətbuat Mərkəzinə daxil olan məlumata görə, İran rejiminin Vətəndaş Vəziyyətlərinin Qeydiyyatı İdarəsi türk adı olan Alparslan adına görə azərbaycanlı körpəyə doğum şəhadətnaməsi verməkdən imtina edib.

İki aydır doğulan azərbaycanlı körpəyə İran rejiminin faşist yanaşması nəticəsində doğum şəhadətnaməsi almaq mümkün olmayıb.

Azərbaycanlı körpənin atası Mustafa Əvəzpur İran rejiminin Vətəndaş Vəziyyətlərinin Qeydiyyatı İdarəsinin antitürk siyasətini tənqid edərək bildirib ki, rejimin onların övladlarına türk adı olan “Alparslan” adı qoyduqları üçün doğum şəhadətnaməsi verməməsi onları və övladlarını böyük problemlərlə qarşı-qarşıya qoyub. Belə ki, övladlarına heç bir vaksin vurdurmağa icazələri yoxdur və ona dərman kitabçası da açılmır.

Qeyd edək ki, İran rejimi Azərbaycan Türk Millətini bir millət kimi məhv etmək məqsədilə onlara öz övladların öz dilində ad qoymağı qadağan edib.