GADTB Güney Azərbaycan Demokratik Türk Birliyi
GADTB: Reuters agentliyinin yaydığı məlumata əsasən, İranın dənizdə gəmilərdə saxlanılan neft ehtiyatlarının həcmi artmışdır. Bildirilir ki, Tehran ABŞ ilə müvəqqəti razılaşma dövründə neft ixracını artırmışdır. Bununla yanaşı, Çinin müstəqil neft emalı zavodları İraq, Birləşmiş Ərəb Əmirlikləri və Qətər neftinin daha aşağı qiymətlə təklif olunması səbəbindən İrandan neft alışını azaltmışdır.
Məlumata görə, treyderlərin bildirdiyinə əsasən, Çinin Şandun əyalətində fəaliyyət göstərən müstəqil neft emalı zavodları son həftələr ərzində Yaxın Şərqdən sanksiyalara məruz qalmayan 16–20,5 milyon barel həcmində neft satın almışdır. Bu yüklər üzrə tətbiq olunan qiymət endirimi hər barel üçün 5–8 ABŞ dolları təşkil etdiyi halda, İranın yüngül nefti üzrə endirim cəmi 2–3 ABŞ dolları olmuşdur.
Kpler şirkətinin məlumatlarına əsasən, cari ay ərzində Çinin İrandan neft idxalı sutkada 556 min barelə qədər azalmışdır ki, bu da 2023-cü ilin yanvar ayından etibarən qeydə alınmış ən aşağı göstəricidir. Treyderlər hesab edirlər ki, satış həcmini artırmaq məqsədilə İran gələn həftə neft yüklərinə tətbiq olunan qiymət endirimini daha da artıracaqdır.
