GADTB Güney Azərbaycan Demokratik Türk Birliyi
GADTB: İraq hökuməti İrana yaxın terror qruplarına silahlarını dövlətə təhvil vermələri üçün 30 sentyabr tarixinədək möhlət verib. Bu qərar Vaşinqton tərəfindən müsbət qarşılanıb, Tehran isə narahatlığını ifadə edib.
İraq hökumətinin sözçüsü Heydər əl-Abudi bildirib ki, bütün silahlı qruplar bu son tarix barədə rəsmi şəkildə məlumatlandırılıb. O qeyd edib ki, müəyyən edilmiş müddət başa çatdıqdan sonra dövlət nəzarətindən kənarda olan istənilən silah qanun çərçivəsində təqib olunacaq.
Bu qərar ABŞ-ın rəhbərlik etdiyi beynəlxalq koalisiyanın İraqdan çıxışı proqramı ilə eyni vaxta təsadüf edir və məqsəd hökumətin nəzarətindən kənarda fəaliyyət göstərən silahlı qrupların fəaliyyətinə son qoymaqdır.
Məlumatlara görə, Əsaib Əhl əl-Həqq və Kətaib İmam Əli də daxil olmaqla bəzi silahlı qruplar öz hərbi strukturlarını İraq dövlətinin nəzarətinə verməyə razılıq bildiriblər.
Bununla belə, Kətaib Hizbullah, Kətaib Seyyid əl-Şühəda və Hərəkat ən-Nücəba kimi qruplar bu qərarı rədd ediblər. Kətaib Hizbullah bəyan edib ki, “bir gülləni belə” dövlətə təhvil verməyəcək.
Təhlilçilərin fikrincə, bu silahlı qrupların İraq dövlətinin rəsmi strukturlarına inteqrasiyası Bağdad, Vaşinqton və Tehran arasında mövcud olan güc balansını dəyişə bilər.
