GADTB Güney Azərbaycan Demokratik Türk Birliyi
GADTB-nin Mətbuat Mərkəzinə daxil olan məlumata görə, irqçi fars rejim 2019-cu ilin noyabr ayı etirazları zamanı yaxalanan Güney Azərbaycanın Məlikan şəhərinin bələdiyyə işçisi Babək Ağazadəni həbsə məhkum edib.
Rejimin Marağadakı İnqilab Məhkəməsi tərəfindən həbs cəzasına məhkum edilib. Məlumata görə, Ağazadənin məhkəməsi hakim Məhəmməd Cabbarinin sədrliyi ilə keçirilib.
Azərbaycanlı fəala “Antirejim qruplara üzv olmaq” ittihamı ilə dörd il, “Sistemə qarşı təbliğat” ittihamı ilə isə bir il həbs cəzası verilib. İslam Cəza Qanununun 134-cü maddəsinə əsasən, məhkəmə qərarı təsdiq olunarsa, Ağazadəyə dörd il həbs cəzası veriləcək.
Bu barədə azərbaycanlı fəalın vəkili Səccad Vəlibəyliyə məlumat verilib.
Qeyd edək ki, Babək Ağazadə 2019-cu il dekabr ayının 16-da ETTELAAT məmurları tərəfindən yaxalanıb. Fəal Təbrizdə ETTELAAT İdarəsinin təcridxanasında iki ay saxlanıldıqdan sonra zindana köçürülüb. Fəal sonra 600 milyon tümənlik vəsiqə qarşılığında zaminə buraxılıb.
