GADTB Güney Azərbaycan Demokratik Türk Birliyi
GADTB: Təbrizdən olan İrfan Şəkurzadə adlı azərbaycanlı gənc və istedadlı tələbə bazar ertəsi səhər edam olunub. Hadisə elmi çevrələrə qarşı təzyiqlər, qeyri-şəffaf məhkəmə prosesi və təhlükəsizlik işlərində məcburi etiraflardan istifadə ilə bağlı yeni narahatlıqlara səbəb olub.
Məlumata görə, 1376-cı ildə doğulan İrfan Şəkurzadə Təbriz Universitetinin elektrik mühəndisliyi fakültəsini fərqlənmə ilə bitirmişdi. Daha sonra o, İran Elm və Sənaye Universitetində aerokosmik mühəndislik və peyk texnologiyaları sahəsində təhsilini davam etdirmiş və istedadlı tələbələrdən biri kimi tanınmışdı.
Mizan Xəbər Agentliyi — İran məhkəmə sisteminə bağlı media qurumu — İrfan Şəkurzadənin “ABŞ və İsrail üçün casusluq” ittihamı ilə edam edildiyini iddia edib. Bildirilir ki, o, “məxfi elmi məlumatların ötürülməsi”ndə iştirak etməkdə günahlandırılıb.
İrfan Şəkurzadə 1403-cü ilin bəhmən ayında SEPAH Kəşfiyyat Təşkilatı tərəfindən saxlanılmış və təxminən 9 ay təkadamlıq kamerada saxlanılmışdı. Yayılan məlumatlara görə, o, istintaq müddətində məcburi etiraf almaq məqsədilə ağır psixoloji və fiziki təzyiqlərə məruz qalıb.
Məlumatlarda qeyd olunur ki, onun elmi fəaliyyəti peyk sınaq proqramları və peyk sistemlərinin mövqe idarəetməsi sahəsi ilə bağlı idi. Magistr işi isə “Atmosfer sürüklənməsindən istifadə etməklə peyk qruplarının nisbi mövqe idarəetməsi” mövzusuna həsr olunmuşdu.
