GADTB Güney Azərbaycan Demokratik Türk Birliyi
GADTB: Qərbi Azərbaycanın cənub-şərqində yerləşən Sayınqala (Şahindəj) rayonunun bir qrup sakini rayonun bölünməsi planına etiraz edərək etiraz ərizəsi imzalayıb və onu bölgənin millət vəkili Höccətülislam Məhəmməd Mirzaiyiyə təqdim ediblər.
Toplu şəkildə imzalanmış bu sənəddə Sayınqala, Mərkəzi və Kəşavərz bölgələrinin çoxsaylı sakinləri bu planın təhlükəsizlik, iqtisadi və siyasi baxımdan mənfi nəticələr doğuracağı barədə narahatlıqlarını ifadə ediblər. Onlar xəbərdarlıq ediblər ki, rayonun bölünməsi baş tutarsa, bölgə bərpası çətin olan fəsadlarla üzləşəcək.
Sayınqala rayonu strateji mövqeyi və xüsusi geosiyasi əhəmiyyəti səbəbilə bölgənin əsas inzibati mərkəzlərindən sayılır. Etirazçılar bildirirlər ki, rayonun iki ayrı inzibati vahidə – Sayınqala və Kəşavərz rayonlarına bölünməsi Cənubi Azərbaycanın ümumi inkişafına mənfi təsir göstərəcəkdir.
Son illərdə bölgədə bir neçə yeni “kiçik rayon” yaradılıb — o cümlədən Baruq (24 min nəfər), Çaharbürc (27 min nəfər) və Lilan (25 min nəfər). Lakin etirazçılar hesab edirlər ki, bu rayonlar inkişaf üçün lazımi potensiala malik olmayıb, və üç il keçməsinə baxmayaraq nə infrastrukturda irəliləyiş baş verib, nə də əhali rifahında yaxşılaşma müşahidə olunub. Onların fikrincə, bu cür addımlar əsas rayonların inzibati və iqtisadi gücünü zəiflətmək məqsədi daşıyır.
