SEPAH bildirir ki, Oman tərəfindən təklif olunan marşrut qəbuledilməz və təhlükəlidir

GADTB: İslam İnqilabı Keşikçiləri Korpusu bəyan edib ki, Hörmüz boğazından gəmilərin təhlükəsiz keçidi yalnız İranın müəyyən etdiyi marşrut vasitəsilə mümkündür. Qurumun açıqlamasına görə, İranla razılaşdırılmadan elan edilmiş digər marşrutlar qəbuledilməz hesab olunur və təhlükəsizlik baxımından risk yaradır.

SEPAH vurğulayıb ki, İranla koordinasiya olmadan bu su yolundan keçməyə çalışan gəmilərlə bağlı tədbirlər görüləcək.

Xatırladaq ki, dünən Oman tərəfindən müvəqqəti bir marşrut təqdim olunmuş və gəmilərdən Hörmüz boğazında hərəkət üçün hələlik həmin marşrutdan istifadə etmələri istənilmişdi.

Bəzi məlumatlarda isə Amerika Birləşmiş Ştatlarının müəyyən sayda gəminin bu marşruta yönləndirilməsində səssiz şəkildə iştirak etdiyi iddia olunur.

İran daha əvvəl başqa bir marşrut müəyyən etdiyini və onu Hörmüz boğazından keçid üçün yeganə təhlükəsiz yol elan etdiyini bildirmişdi.