GADTB Güney Azərbaycan Demokratik Türk Birliyi
GADTB: Əldə olunan məlumatlara görə, həbs edilmiş azərbaycanlı fəallar Siyamək Mirzayi və Əli Vasiqi bu gün, 16 iyul 2026-cı il tarixində telefon əlaqəsi zamanı ailələrinə bildiriblər ki, yenidən Ərdəbil Kəşfiyyat İdarəsinin təcridxanasına aparıldıqdan və orada üç gün saxlanılıb dindirildikdən sonra təkrar Ərdəbil Mərkəzi Həbsxanasına qaytarılıblar.
Həmin iş üzrə saxlanılan digər azərbaycanlı fəal Əsgər Əkbərzadə isə həbsindən 19 gün keçməsinə baxmayaraq, hələ də Ərdəbil Kəşfiyyat İdarəsinin təcridxanasında saxlanılır və indiyədək həbsxanaya köçürülməyib. Onun təcridxanada saxlanılmasının davam etməsi, xüsusilə də səhhəti və dərmanlara ehtiyacı ilə bağlı əvvəllər yayılan məlumatlar fonunda ailəsi və yaxınlarının narahatlığını daha da artırıb.
Siyamək Mirzayi, Əli Vasiqi və Əsgər Əkbərzadə 2026-cı il iyunun 28-də Ərdəbildə təhlükəsizlik qüvvələri tərəfindən saxlanılıblar. Daha əvvəl yayılan məlumatlarda bu üç fəala qarşı “qanunsuz qruplara üzv olmaq” və “sistem əleyhinə təbliğat aparmaq” kimi ittihamların irəli sürüldüyü bildirilmişdi.
