Təbrizdə pul ödəyib avtomobil ala bilməyənlər etiraz aksiyası keçirib

GADTB-nin Mətbuat Mərkəzinə daxil olan məlumata görə, ödəniş edib avtomobilini təhvil ala bilməyən Azvico (Azərbaycan Maşınqayırma Qrupu) şirkətinin müştəriləri Təbriz şəhərlərində etiraz aksiyası keçiriblər.

Azvico şirkəti 5 min müştəriyə qarşı öhdəliklərini yerinə yetirməyib. Ödənişi tam olunan avtomobillər iki il əvvəl təhvil verilməli idi.

Buna görə də müştərilər iyunun 10-da Şərqi Azərbaycan Valiliyinin binası qarşısında etiraz aksiyası keçirib və Azvico şirkətinin ödənişi tamamilə aldığına baxmayaraq onlara “MC 360” markalı avtomobilin təhvil verməsi ilə bağlı öhdəliyini yerinə yetirmədiyini bildiriblər.

Azərbaycanlı etirazçılar təhvil tarixindən iki il keçməsinə baxmayaraq istər Azvico şirkətinin, istər müraciət etdikləri digər qurumların məsələyə cavabdehlikdən boyun qaçırdığını bildirərək Şərqi Azərbaycan valisindən mövzu ilə bağlı tədbir görməsini tələb ediblər.

Oxşar aksiya Tehranda da keçirilib.