GADTB Güney Azərbaycan Demokratik Türk Birliyi
GADTB: Təbrizin Heydərabad məhəlləsində su və kanalizasiya idarəsinin əməkdaşları tərəfindən aparılan qazıntı işləri zamanı kütləvi məzarlığın aşkarlandığı barədə məlumatlar yayılıb. Bildirilir ki, bu məzarlıq Azərbaycan Milli Hökumətinin süqutundan sonra Azərbaycan xalqına qarşı həyata keçirilən qanlı repressiyanın qurbanlarına aid olub.
Məlumatlara görə, 1946-cı ilin dekabrı İran ordusunun Təbrizə daxil olmasından sonra mərkəzi hökumət qüvvələrinin Azərbaycan xalqına qarşı həyata keçirdiyi repressiyalar zamanı minlərlə azərbaycanlı öldürülüb.
Bəzi yayımlanmış mənbələrdə və xatirələrdə də bu repressiyalar zamanı öldürülənlərin sayının çox olduğu qeyd edilir. Pəhləvi rejiminin yüksək vəzifəli məmurlarından olmuş Hüseyn Fərdustun adı da qətlə yetirilənlərin sayı ilə bağlı bəzi rəvayətlərdə çəkilir.
Təbrizdə kütləvi məzarlığın aşkarlanması ilə bağlı yayılan görüntülər Azərbaycan Milli Hökumətinin süqutundan sonra Azərbaycan xalqına qarşı həyata keçirilmiş repressiya və qırğın məsələsini yenidən gündəmə gətirib.
