GADTB Güney Azərbaycan Demokratik Türk Birliyi
GADTB: Təbrizin mühüm və dəyərli tarixi abidələrindən biri olan Həsən Padşah məscidinin vəziyyəti vətəndaşlar və tarix həvəskarları arasında ciddi narahatlıq yaradıb.
Aparılan müşahidələr göstərir ki, tarixi abidədə həyata keçirilən bərpa işlərindən sonra bina nəinki arzuolunan vəziyyətə gətirilməyib, əksinə yeni problemlər və zədələrlə üzləşib. Tikilinin bəzi divarları yararsız vəziyyətdədir və müəyyən hissələrdə uçma təhlükəsinin olduğu bildirilir. Bu isə həm təhlükəsizlik, həm də tarixi irsin qorunması baxımından narahatlıq doğurur.
Abidənin qalan hissəsində bir neçə ildir bərpa işləri aparılsa da, unikal kaşı naxışları ilə seçilən əsas hissə tikilinin arxa tərəfində faktiki olaraq zibilliyə çevrilmiş vəziyyətdə qalıb. Bundan əlavə, əvvəllər bərpa məqsədilə toplanmış çoxsaylı şirli kaşıların hazırda harada olduğu barədə heç bir məlumat yoxdur.
Məlumata görə, Təbrizin digər tarixi abidələri olan Təbriz Ərki, Məqbərətüş-Şüəra və Rəb-i Rəşidi komplekslərində aparılan bərpa layihələri də hələlik qeyri-müəyyən vəziyyətdə qalmaqdadır.
Qeyd olunur ki, Sahibəmir meydanı və Həsən Padşah kompleksi Ağqoyunlu hökmdarı Uzun Həsən dövrünün yadigarıdır. Tarixi mənbələrə görə, bu meydan öz dövründə dünyanın ən böyük hökumət meydanlarından biri olub və sonralar İsfahandakı Nəqşi-Cahan Meydanı (Əli Qapı meydanı) onun nümunəsi əsasında formalaşdırılıb.
Pəhləvi dövründə indiki Mədəni küçəsinin salınması bəhanəsi ilə bu tarixi meydan iki hissəyə bölünüb və onun böyük bir hissəsi məhv edilib. Bu gün isə qalan hissələrin də baxımsız vəziyyətdə olması şəhərin tarixi irsinin gələcəyi ilə bağlı narahatlıqları artırır.
