Traxtur klubunun sahibi Məhəmmədrza Zunuzi bəyanatı: “Futboldakı mövcud vəziyyəti düzəldə bilmirsinizsə, kənara çəkilin”

GADTB: Traxtur futbol klubunun sahibi Məhəmmədrza Zunuzi Mütləq yayımladığı bəyanatda İran futbolunda mövcud idarəçilik vəziyyətini kəskin tənqid edib və Futbol Federasiyasının rəhbərliyini məsuliyyətli olmağa çağırıb.

Bəyanatda deyilir ki, Mehdi Tac ya İran futbolunu idarə etmək qabiliyyətinə malikdir, ya da malik deyilsə bu vəzifədən istefa verməlidir. Zunuzinin sözlərinə görə, əgər mövcud vəziyyət bu şəkildə davam edərsə, Traxtur klubunun bu liqada iştirak etməsi üçün heç bir əsas qalmayacaq. O vurğulayıb ki, ədalətli şəkildə idarə olunmayan futbolun ümumiyyətlə mövcudluğu sual altına düşür.

Klub rəhbəri bildirib ki, Traxtur kimlərinsə zəif idarəçiliyi və şəxsi maraqları naminə xərclər çəkmir, üstəlik azarkeşlərin etnik təhqirlərə məruz qalmasına da dözməyəcək. Onun sözlərinə görə, bu cür şüarlar ya federasiya tərəfindən susqunluqla qarşılanır, ya da bəzi hallarda federasiya qurumları tərəfindən görməzdən gəlinir və bu, qəbuledilməzdir.

Zunuzi hakimliyin “mühəndisliyi”ndən tutmuş yarışların planlaşdırılmasına qədər bir çox məsələnin Traxturun əleyhinə qurulduğunu bildirib. O qeyd edib ki, bəzi texniki səhvlər bağışlana bilər, lakin etnik təhqirlər heç vaxt qəbul edilə bilməz və nə özü, nə də Traxtur azarkeşləri bu məsələdən keçməyəcək.

Bəyanatda xüsusilə vurğulanır ki, bir şəxsə yönəlmiş təhqirə görə Traxtur misli görünməmiş cəzalarla üzləşdiyi halda, ötən mövsüm müxtəlif stadionlarda Traxtur klubuna, onun futbolçularına və ən əsası İran türklərinə qarşı səsləndirilən etnik təhqirlərə görə federasiya tərəfindən heç bir ciddi addım atılmayıb. Zunuzi bunu açıq-aşkar ikili standart və ədalətsizlik adlandırıb.

Traxtur sahibinin sözlərinə görə, bu gün hörmətsizliklə üzləşən insanlar tarix boyu, o cümlədən səkkizillik müharibədə və son on iki günlük müharibə zamanı — Təbrizin ən çox hücuma məruz qaldığı dövrdə — İranın yanında olublar. O xatırladıb ki, şəhid Bakiri və Baqiri kimi sərkərdələr də məhz bu xalqın içindən çıxıb və İranın bütün xalqları bu torpağın müdafiəsində rol oynayıb.

Zunuzi bəyanatının sonunda Mehdi Taca və Futbol Federasiyasındakı bütün məsul şəxslərə müraciət edərək bildirib ki, Traxturu İran futbolunda “yad element” kimi görməsinlər. Onun fikrincə, bu cür idarəçilik istər-istəməz ölkə xalqları arasında parçalanmaya səbəb olur. Əgər bu vəziyyəti düzəltmək gücləri yoxdursa, məsuliyyəti başqalarına təhvil verməlidirlər.

Bəyanatda sonda qeyd olunur ki, ya İran futbolu islah ediləcək, ya da Traxtur klubu geri çəkiləcək və öz hüquqlarını bərpa etmək üçün qanuni və beynəlxalq yollarla, o cümlədən FİFA vasitəsilə mübarizə aparacaq. Zunuzi vurğulayıb ki, ölkə xalqları etnik şüarlardan bezib və bu vəziyyətə artıq dözmək niyyətində deyil.