GADTB Güney Azərbaycan Demokratik Türk Birliyi
GADTB: Türkiyənin Bank Tənzimləmə və Nəzarət Qurumu (BDDK) İranın “Bank Millət” bankının İstanbulda yerləşən mərkəzi filialının fəaliyyət icazəsini ləğv edib.
Bu qərar Türkiyənin “Rəsmi Qəzet”ində dərc olunub və ölkənin bankçılıq qaydalarına əsasən qəbul edilib. Həmin qaydalara əsasən, əmanətçilərin hüquqları və ya maliyyə sisteminin təhlükəsizliyi və sabitliyi üçün risk yarandığı halda bankın fəaliyyət icazəsi ləğv edilə bilər. Rəsmi açıqlamada bu qərarın ABŞ-ın tədbirləri və ya Vaşinqtonun sanksiyaları ilə birbaşa əlaqəli olduğu qeyd edilməyib.
Sahibliyi İran dövlətinə məxsus olan Bank Millət bundan əvvəl də ABŞ sanksiyalarının təsiri nəticəsində beynəlxalq maliyyə şəbəkəsinə çıxış imkanlarının əhəmiyyətli hissəsini itirmişdi.
İstanbul filialının fəaliyyət icazəsinin ləğvi İran İslam Respublikasına qarşı iqtisadi və maliyyə təzyiqlərinin artdığı bir vaxtda baş verib. ABŞ isə müttəfiqləri və tərəfdaşlarını Tehrana qarşı iqtisadi təzyiqləri gücləndirməyə çağırıb.
