GADTB Güney Azərbaycan Demokratik Türk Birliyi
GADTB: Türkiyənin müdafiə şirkəti Samsun Yurt Savunma (SYS) helikopterlərdən pilotsuz uçuş aparatlarını (PUA) və dronları məhv etmək üçün hazırlanan yeni nəsil iriçaplı pulemyot — CANiK M3 FALCON-un xaricə tədarükünə başlayıb.
12,7×99 millimetrlik iriçaplı pulemyot Türkiyə müdafiə şirkətlərinin yeni sistemlərini təqdim etdiyi və beynəlxalq əməkdaşlıq sazişləri imzaladığı, bu həftə İstanbulda keçirilən SAHA 2026 Beynəlxalq Müdafiə və Aviasiya Sərgisində ilk dəfə nümayiş etdirilib.
Sərgidə “Anadolu” agentliyinə danışan SYS-in sədri Zəfər Aral CANiK M3 FALCON-un aşağı maya dəyərinə malik pilotsuz uçuş aparatları və hərəkət bacarığına malik döyüş sursatlarının xüsusi olaraq hazırlandığını bildirib.
“CANiK M3 FALCON tamamilə dronlara, “Şahed” tipli dronlara qarşı, helikopterlərdən dronları zərərsizləşdirmək üçün hazırlanmış bir sistemdir. Hazırda fəal şəkildə istifadə olunur. İlk tədarüklər Pakistan və Azərbaycana həyata keçirilib”, — deyə o bildirib.
Z.Aral sistemin helikopterlərə radar tərəfindən aşkar edilən pilotsuz uçuş aparatlarına müdaxilə etmək imkanı verdiyini qeyd edərək, “Şahed” tipli pilotsuz uçuş aparatlarının saatda təxminən 250 kilometr sürətlə uça bildiyini və helikopterlərin bu sürətə çata biləcəyini vurğulayıb.
Z.Aral həmçinin deyib: “Radarlar bu dronları və ya pilotsuz uçuş aparatlarını aşkar etdiyi zaman helikopterlər havaya qalxır, qapılarını açaraq FALCON-larla dronları və ya PUA-ları tam şəkildə zərərsizləşdirə bilirlər.”
Bu konsepsiyanın nümayiş mərhələsindən əməliyyat istifadəsinə keçdiyini də əlavə edən Z.Aral bildirib: “Bu yeni döyüş konsepsiyası ilk dəfə nümayiş və istifadə edilir. Çünki bu, yeni döyüş konsepsiyasıdır. Bu ehtiyac yeni yaranıb və həll yolu helikopterlərdən və FALCON-lardan istifadə edilməklə formalaşdırılıb.”
Azərbaycana 40-dan çox FALCON tədarük edilib
SYS-in sədri son münaqişələrin münasib maya dəyərinə malik dron əleyhinə həllərin zəruriliyini ortaya qoymasından sonra sistemə tələbatın yarandığını bildirib.
Silahın helikopterlərdən dəqiqədə 1200 güllə atış sürətinə çata bildiyini və xaricdən gələn tələblər əsasında hava platformalarında istifadə üçün uyğunlaşdırıldığını qeyd edən Z.Aral deyib: “Silah onsuz da var idi. Biz silahı təkmilləşdirərək helikopter üzərində rahatlıqla istifadə edilə biləcək vəziyyətə gətirdik.”
Z.Aralın sözlərinə görə, Azərbaycandakı 20-dən çox helikopterə inteqrasiya edilməsi üçün 40-dan çox CANiK M3 FALCON-un tədarükünə başlanılıb. İlk məhsullar Pakistana da göndərilib.
Sistemin Türkiyənin “Gökbey” helikopterində istifadə edilə bilməsi üçün ilkin işlərə də başlanıldığını bildirən Z.Aral testlərin mərkəzi Anadoluda yerləşən Konyada Türkiyənin müdafiə sənayesi nəhəngi “Aselsan” ilə birlikdə tamamlandığını əlavə edib. “Xaricdən başqa tələblər də gələcək”, — deyən Z.Aral sistemin “Şahed” tipli PUA-lara və ya radar tərəfindən aşkar edilərək izlənilə bilən istənilən PUA-ya qarşı istifadəyə hazır olduğunu da bildirib.
SYS çoxqatlı hava hücumundan müdafiə arxitekturasını nümayiş etdirir
“SYS Group” SAHA 2026-da UNIROBOTICS tərəfindən hazırlanan sistemləri də əhatə edən “inteqrasiya edilmiş müdafiə ekosistemi” vizyonunu təqdim edib.
Bunların arasında TRAKON uzaqdan idarə olunan silah stansiyalarını, CANiK iriçaplı pulemyotlarını və VENOM LR orta kalibrli top sistemini vahid inteqrasiya edilmiş şəbəkədə birləşdirən Paylanmış Mobil Çoxqatlı Hava Hücumundan Müdafiə Sistemi yer alır.
Sistem müasir dron təhdidlərinə qarşı müxtəlif məsafələrdə çoxqatlı üstünlük təmin etmək üçün hazırlanıb və nisbətən aşağı maya dəyərinə malik, dayanıqlı strukturu ilə xarici nümayəndə heyətlərinin marağına səbəb olub.
SYS-in sədri Z.Aral bildirib ki, SYS iriçaplı pulemyotlar, toplar və uzaqdan idarə olunan taretlər də daxil olmaqla, müharibənin dəyişən xarakterinə uyğun silah və platformalara investisiya etməyə davam edir.
Kosova ilə 50 milyon dollar dəyərində saziş
Z.Aral həmçinin sərgi zamanı SYS-in mövcud zirehli texnikanı silahlandırmaq üçün Kosova ilə mühüm saziş imzaladığını açıqlayıb.
Məsələ ilə bağlı danışan Z.Aral deyib: “Saziş Kosovonun əlində mövcud olan zirehli texnikanın silahlandırılması ilə bağlıdır. Bizdə 30×113 millimetrlik toplar var. Kosovodakı zirehli texnikanın 30×113 millimetrlik taret və toplarla silahlandırılması barədə saziş imzalanıb. 100 ədəd quru nəqliyyat vasitəsini taret və 30×113 millimetrlik toplarla silahlandıracağıq. Bu, 50 milyon dollardan artıq dəyəri olan sazişdir.”
Müharibənin getdikcə pilotsuz sistemlərə və xərc baxımından səmərəli silahlara doğru yönəlməsi ilə Türkiyənin qlobal müdafiə sənayesində yeni mövqeyə yüksəldiyini bildirən SYS-in sədri deyib: “Döyüş konsepsiyası dəyişib. Müharibələr artıq çox xərc tələb etməyən pilotsuz quru, dəniz və hava vasitələri, həmçinin bu vasitələrin daşıya bildiyi ən effektiv silahlarla aparılmağa başlanıb. Artıq döyüş konsepsiyası budur. Demək olar ki, Türkiyə bu gün dünyada bu konsepsiyaya malik yeganə ölkədir. Buna görə də son 6 ayın xüsusilə son 3 ayı Körfəz ölkələrindən Filippinə və İndoneziyaya, Malayziyadan Afrika ölkələrinə qədər bu yeni döyüş konsepsiyası üçün ciddi axtarışlara başlayan dövlətlərlə daim təmasdayıq”, — deyə o bildirib.
