GADTB Güney Azərbaycan Demokratik Türk Birliyi
GADTB: Xələc türk dili və mədəniyyəti üzrə tanınmış yazıçı və tədqiqatçı Aliəsğər Cəmarasi 61 yaşında vəfat edib.
Aliəsğər Cəmarasi Xələc türklərinin dili və mədəni irsi sahəsində bir neçə kitabın müəllifi olub və təxminən üç onillik ömrünü Xələc türklərinin dil və mədəniyyət elementlərinin toplanmasına, qorunmasına və araşdırılmasına həsr edib.
Onun əsas əsərləri sırasında “Xələclər – qədim türklərin yadigarı”, “Qarşubalığa salam”, “Xələc–fars lüğəti”, “Xələc dilinə əlvida (Xələc türkcəsində danışıq və yazı)”, “Gül Sənubər (hekayə)”, “Tülkü matalı”, “Fərahan xələclərincə matallar və əfsanələr”, “Aştiyan və Xələcistan xələclərincə matallar və əfsanələr”, “Xələc dilində Molla Nəsrəddinin məzəli sözləri”, “Xəyal Balığı (xəyali şəhər)”, “Xələc türkcəsində müdriklərin hikmətli sözləri” və “Xələc ordusu (tarix boyu Xələc tayfalarının məskunlaşması)” xüsusi yer tutur.
Aliəsğər Cəmarasi İranın Mərkəzi ostanında, Tefreş rayonuna bağlı və Xələc türklərinin yaşadığı Telxab kəndində anadan olub. O, siyasi elmlər və islami biliklər ixtisası üzrə magistr dərəcəsinə malik idi və uzun illər boyunca Xələc türklərinin dil və mədəni irsinin qorunması, tədqiqi və yazıya alınması istiqamətində fəaliyyət göstərib.
Onun vəfatı Xələc türklərinin mədəni və elmi camiəsi üçün böyük itki kimi qiymətləndirilir.
