Zəncanın mədəniyyət və ədəbiyyat xadimləri ustad Rəhgüzər Hidəci ilə görüşüblər

GADTB: Zəncanın bir qrup şairi, yazıçısı və media nümayəndəsi Hidəc şəhərində yaşayan tanınmış şair Rəhgüzər Hidəcinin evində onunla görüş keçiriblər.

Görüş zamanı ustad Rəhgüzər Hidəci həyat xatirələrindən, şairlik fəaliyyətinin ilk illərindən və mədəni fəaliyyətlərindən danışıb, uzun illər ərzində qazandığı ədəbi təcrübələrini iştirakçılarla bölüşüb.

Rəhgüzər Hidəci Əbhər Şeir və Ədəbiyyat Dərnəyinin təsisçilərindən biridir. O, yaradıcılığında həm fars, həm də türk dillərindən istifadə edib. Şeirlərində hikmət, irfan və məhəbbət kimi mövzular geniş yer tutur.

Şairin müəllifi olduğu əsərlər sırasında “Macərayi-Eşq”, “Nəğməhayi Aşiqanə”, “Fəryadi-Bisəda”, “Pərvaz dər Qəfəs” və “Divani-Rəhgüzər Hidəci” yer alır.

 Görüş ustad şairin ədəbi və mədəni irsinə ehtiramın ifadəsi, eləcə də onun xatirə və təcrübələrinin gələcək nəsillər üçün qorunub saxlanılması məqsədilə təşkil edilib.