ادتاج اتحادیه دمکراتیک ترک آذربایجان جنوبی
گادتب: وزارت اطلاعات دا اولدوغوم زامان قیرخ بیرینجی گون منی بازجویی اوتاغینا آپاردیلار.
چوخلو یازی- پوزودان سونرا دئدیلر کی داها سنن ایشیمیز یوخ؛ پرونده نی باغلادیق ؛ ساباح حتما آزادسان.
ائوه زنگ وور؛ سحر ساعات اون بیردن اون ایکی آراسی وثیقه گتیرسینلر؛ دوغروسو ایسته میریک زیندانا گئده سن!
بازجویا دئدیم: من ایستمیرم زنگ وورام؛ بیردن سؤزوز گئنه دوز چیخماز آتام گیلین گؤزو یول دا قالار…
اودا دئدی : پرونده نی من باغلامیشام؛ یالانیمیز یوخ‌‌دورکی ؛حتما کی‌ساباح آزاد اولاجاقسان …
نیگهبان گلدی منی آپاردی تئلفون اوتاغینا
اورک‌دن بیلیردیم گئنه یالاندی آنجاق ائوه زنگ ووردوم.
هر زامان کی‌کیمی آتام گوشینی گؤتوردو.
سلام آتا کئفین؟
سلام شاهین سن-سن بابا؟ کئفین نئجه دی؟
ساغول آتا یاخشیام.
بابا داریخما ها ساباح آزادسان
موسوی(بازپرس) بو گون منه دئدی ساباح وثیقه گتیر شاهین چیخسین …
اولسون آتا ایشاالله کی‌اوجور اولار؛ آما سیز چوخ گؤزلمه یین…
سنه دئییبلر آزادسان ساباح؟
هن آتا منه ده ایندی دئدیلر سنه زنگ آچام.
یاخجی بابا دوستلاریوا سلام یئتیر؛ ساباح سحر تئزدن من دادگاه دا اولاجاغام…
آتامینان ساغولاشاندان سونرا بازجو دئدی شاهین بیزی حلال ائله و اومود ائدیرم باشیوی سالاسان آشاغا و بیر داها بوجور یئرلره گلمییسن…
قبول؟
من اوره ک دن بو یولا اینانمیشام و الیمدن گلن قدر بو یولدا چالیشاجاغام.
اودا دئدی: بونو بیل کی من ده اولماسام گئنه آیری نفر سنی بوردا بازجویی ائلیه جک…
قاییتدیم اوتاغا و گئجه هر کسینن سون سؤزلری دانیشدیم و اتاق داشلاریمین هر بیریسی( داوود قاقاش؛ آرسلان آبی ؛حاج صولت) سئوینجیدن دئییردیلر کی الله ها چوخ شوکور بو اوتاقدان دا قراردی بیر نفر آزاد اولا…
گئجه نی سحره کیمین داوود قاقاشینان دانیشدیق و گؤزله‌ییردیک قاپیی اوزوموزه آچیلا…
قیریخ ایکینجی گون؛
قیرخ اوچونجو گون؛
خبر اولمادی…
آچیقجاسی دؤردوموزده کئفسیز اولدوق و من تکجه آتاما اوزولوردوم کی مجبور اولموشدو بو یاشیندا بیر سیرا یالانچی آداملارین سؤزلرینه اینانسین…
قیرخ دؤردونجو گون ناهاردان قاباق قاپی آچیلدی؛ نیگهبان منی چاغیردی؛
تئز هر‌کسینن قوجاقلاشیب ساغوللاشدیم و سون لحظه داوود قاقاشیما بوزقورد توتوب گئتدیم…
گؤزو باغلی آپاردیلار بازپورسون اوتاغینا.
دؤرد ایل قاباق تراختور حاقدا بیر مقاله یازمیشدیم اونا گؤره موسوی قاچا-قاچا ایکی‌سوال سوروشدو و یئنی دن ایکی‌تازا ایتهام ووردو( تبلیغ علیه نظام؛ عضویت در گاماج)
دئدی تئز بورانی ایمضالا و یاز کی اعتیراضیم وار؛ آتان گئدیب دادگاها و وثیقه حاضیردی حتما آخشام آزاد اولاجاقسان…
بیر داها قایتاردیلار اوتاغیما؛
دوستلار منی گؤرجک پوزقون اولوب دئدیلر:
گئنه کی سن گلدین…
سونرالار بیلدیم او گون موسوی یالان دانیشیردی و تکجه گلمیشدی اوتوز گون بازداشتیمی تمدید ائلیه و ایمضا آلا گئده…
او گوندن سونرا داها هئچ واخت منی بازجویی اوتاغینا آپارمادیلار و تکجه هر اون گوندن بیر تئلفون وورماغا چاغیریردیلار.
آتام دا هر سئری دئیردی:
داریخما ها بابا؛
دانیشمیشام قول وئریبلر؛ بو‌هفته ایشاالله گلیرسن ائویمیزه …
نهایت یئتمیش بئشینجی‌گون بیرلیک ده اعتصاب ائله دیک و بیر سیرا ندن لره گؤره سؤز وئردیلر کی ساباح آزاد اولاجاقسیز.
هر حال دا اوتوز اوچ گوندن سونرا وزارت اطلاعات دان آزاد اولدوم و آپاردیلار زیندانا !!!
ایندی‌نئچه آی دان سونرا قاضی(حملبر) او یالان ایتهام لارا گؤره منیم حاقیم دا بیر ایل زیندان قراری وئریب!!!
برگرفته شده از صفحه اینستاگرام فعال ملی آزربایجانی شاهین برزگر
