گادتب: قاجار دؤرونده قاراباغین آغابییم خانیم آدلی بیر گؤزل و خوش الحانلی مغنّیسی وار ایمیش.
آتاسینین اصراری ایله آغابَییم خانیمی فتحعلیشاها گلین وئریرلر. آنجاق آغابَییم بو وصلته راضی دئییلدی.
توی گئجهسی گَردَک اوتاغینا گئتمهیه حذر ائدیرمیش.
قاراووشلارین (کنیز) بیری آغابَییمه دئییر: «سن شاه آروادیسان، اوتاغا گئتمهسن دار آغاجینا گئدرسن.
آنجاق فتحعلیشاها یاخینلاشماق ایستهمیرسنسه، من یولون دئییرم آنجاق شرطی بودورکی، شاها منیم آدیمی وئرمهیهسن!».
روایتلره گؤره، فتحعلیشاهین آناسینین دونونو گئیدیریب، گردک اوتاغینا یولا سالیر. فتحعلیشاه اوتاغا گیردیکده شاشیریب و بو قضیهنی کیم اونا اؤیرهدیبسه، آچیقلاماق ایستهییر. آنجاق آغابَییم خانیم، قاراووشون آدین چکمیر.
فتحعلیشاه دئییر: «آدین دئمهسن، سنی بوراخمایاجام و سنی عؤمورلوک قصرده زندانی ائدهجم». آغابَییم فتحعلیشاها دئییر: منه قصرده گول بئجرتمهیه بیر باغچا آییر، من بورادا (تهران) قالارام و شاه بو ایشی گؤرور. آغابَییم خانیم، بو باغچانین آدین «وطن باغی» قویور.
خاری بولبول، تکجه قاراباغدا بیتر. دونیانین هئچ بیر یئرینده بو چیچک بیتمیر. آغابَییم خانیم بیر گون قاراباغدان اؤترو داریخاندا، بو شعری یازیب:
وطن باغی آل- اَلواندیر،
یوخ ایچینده خاری_بولبول.
چوخلو مغنّیلریمیز، خاری بولبولو بیر نوع قوش بیلیب و ماهنیلاریندا «یوخ اوستونده خاری بولبول» اوخویوبلار. سهو ائدیبلر! ایندیسه خاری بولبولون عطری گلیر. شانلی اوردوموز، بو گون زنگیلانا آذربایجان بایراغی آسیب. کلبجر، لاچین و شوشانین آزادلیغینی آرزو ائدیریک.