GADTB Güney Azərbaycan Demokratik Türk Birliyi
GADTB: Güney Azərbaycan Milli Hərəkatının fəalı və siyasi məhbus Əli Babayi 12 gün təkadamlıq kamerada saxlanıldıqdan sonra Təbriz Mərkəzi Həbsxanasının xüsusi bölməsinə köçürülüb.
Əli Babayi bundan əvvəl həbsxanada siyasi məhbusların hüquqlarını müdafiə etdiyi və digər məhbuslara qarşı rəftarla bağlı etiraz etdiyi üçün Təbriz Kəşfiyyat İdarəsinin əməkdaşları tərəfindən döyülərək təkadamlıq kameraya salınmışdı. O, təkadamlıq kamerada saxlanıldığı müddətdə ictimai telefondan istifadə və ailəsi ilə əlaqə saxlamaq hüququndan da məhrum edilmişdi.
Yayılan məlumatlara görə, Təbriz Kəşfiyyat İdarəsi və digər təhlükəsizlik qurumları son aylarda Əli Babayi və onun ailəsinə davamlı psixoloji təzyiqlər göstəriblər. Siyasi məhbus siyasi məhbusların hüquqlarını müdafiə etdiyinə görə dəfələrlə müxtəlif məhdudiyyətlər və təhlükəsizlik təzyiqləri ilə üzləşib.
Əli Babayi aylardır Təbriz Mərkəzi Həbsxanasında saxlanılır. O, bundan əvvəl də Yürüş Mehrəlibəylinin həbsxananın xüsusi bölməsinə köçürülməsinə etiraz olaraq təxminən 60 siyasi məhbusla birlikdə aclıq aksiyasına başlamışdı.
Bundan başqa, əvvəlki cinayət işi ilə yanaşı, hazırda onun barəsində “rejim əleyhinə təbliğat” ittihamı ilə yeni cinayət işi də açılıb.
