ادتاج اتحادیه دمکراتیک ترک آذربایجان جنوبی
گادتب: ۲۸ مای- آذربایجانین موستقیللیک گونودور. آذربایجان تورک میللتی ۱۹۱۸-جی ایل مایین ۲۸-ده قدیم دؤولتچیلیک عنعنهلرینین معاصر دؤورده داوامی کیمی آذربایجان خالق جمهوریتینی قورموشدور. موستقیل آذربایجان رئسپوبلیکاسی ایسه آذربایجان خالق جمهوریتینین واریثیدیر. لاکین آذربایجانین دؤولتچیلیک تاریخی مین ایللرله اؤلچولور. آذربایجان تورک میللتی تاریخ بویو اونلارلا بؤیوک ایمپئراتورلوقلار و چوخ سایلی دؤولتلر قورماقلا زنگین دؤولتچیلیک مدنیتی و تاریخینه مالیک اولموشدور.
آذربایجانین قدیم تاریخه و زنگین دؤولتچیلیک عنعنهسینه باخمایاراق سون یوز ایللیکلرده روسلارلا قاجار دؤولتینین محاربهسی نتیجهسینده ایکییه پارچالانمیشدیر. آذربایجانین یالنیز قوزئی حیسهسینده موستقیل آذربایجان جمهوریتی قورولسا دا، آذربایجانین گونئی حیسهسی باشدا اولماقلا بؤیوک حیسهلری اسارت آلتینا سالینمیشدیر. ۱۹۱۸-جی ایل مای آیینین ۲۸-ده تورک دونیاسی و شرق عالمینده ایلک دئموکراتیک، پلورالیست و دونیوی آذربایجان دؤولتینین یارانماسی پارچالانمیش آذربایجانین بوتون حیسهلرینین دؤولتیدیر و اصلینده محمد امین رسولزاده نین قوردوغو آذربایجان خالق جمهوریتی آذربایجان تورک میللتینین چوخ عصرلیک دؤولتچیلیک تاریخینین پارلامئنتلی جمهوریت فورماسیندا چاغداش دؤورده داوامیدیر. تصادفی دئییلدیر کی، محمد امین رسولزاده نین قوردوغو آذربایجان خالق جمهوریتی هم ده گونئی آذربایجانین موستقیللیگینی برپا ائدیب آذربایجان تورک جمهوریتی قورماسینا ان ایدهآل مودئل کیمی گوندمدهدیر.
آذربایجان خالق جمهوریتی آوروپانین دئموکراتیک ده یرلری ایله شرق مدنیتینین خصوصیتلرینی بیرلشدیرن یئنی بیر دؤولت و جمعیت نمونهسی میدانا گتیرمیشدیر. روسلارین ایشغالچیلیق سیاستی و آذربایجانا هوجومو نتیجهسینده ایشغالا معروض قالان آذربایجان خالق جمهوریتی قیسا مدت عرضینده تاریخه دوشن بؤیوک ایشلر گؤرموشدور. آذربایجان خالق جمهوریتی قیسا مدتده دؤیوش قابیلیتینه مالیک آذربایجان اوردوسونو تشکیل ائتمیش، دؤولت قوروجولوغونون بوتون ساحهلرینده ثمرهلی ایش آپاریلمیش، پارلامئنت یارادیلمیش و یئنی، میللی طلبلره، دئموکراتیک پرینسیپلره اویغون اولان دؤولت اورقانلاری قورولموشدو. آذربایجانین تاریخینده ایلک اونیوئرسیتئت – باکی دؤولت اونیوئرسیتئتی یارادیلمیش، تحصیلین میللیلشدیریلمهسی، یئنی تدریس موسسیسهلرینین آچیلماسی ساحهسینده آذربایجان تورک میللتینین سونراکی مدنی ترققیسی اوچون اساسلی زمینه چئوریلن بیر سیرا اؤنملی ایشلر گؤرولموشدور.
آذربایجان خالق جمهوریتی آذربایجانین چاغداش دؤور دؤولتچیلیگینه اساس و بونؤوره اولماقلا یاناشی، سیویل دونیایا دا موترققی ده یرلر تؤحفه وئرمیشدیر. آذربایجان خالق جمهوریتینده اینسانلارا چوخ بؤیوک حقوق و آزادلیقلار وئریلمیشدیر. اینسانلارین برابرلیگی پرینسیپلرینه اساسلانان آذربایجان خالق جمهوریتی هله غربده بئله قادینلارین سئچمک و سئچیلمک حقوقو اولمادیغی بیر واختدا قادینلارا بو حقوقو وئرمیشدی.
موستقیل آذربایجان جمهوریتی او تایلی-بو تایلی آذربایجانین گؤرکملی سیمالاریندان محمد امین رسولزاده و فتحعلی خان خویلونون قوردوغو آذربایجان خالق جمهوریتی موستقیل آذربایجان جمهوریتینین واریثی کیمی تکجه قوزئی آذربایجاندا یاشایان آذربایجان تورکونون دئییل، بوتون دونیا آذربایجانلیلارینین دؤولتیدیر. بو دؤولت هم ده گونئی آذربایجاندا دؤولتین و بوتؤو آذربایجانین یارانماسی اوچون دایاق نقطهسی و ایدئیا قایناغیدیر. گونئی آذربایجان دئموکراتیک تورک بیرلیگی (گادتب) آذربایجان خالق جمهوریتینین داوامی اولان موستقیل آذربایجان جمهوریتینی دونیا آذربایجانلیلارینین موستقیل دؤولتی حساب ائدیر و جمهوریتین تورکچولوک ایدهآللارینا صداقتله گونئی آذربایجانین موستقیللیگی و بوتؤو آذربایجانین یارانماسی اوغروندا فعالیت گؤسترمه یی اؤزونه شرف بیلیر. آذربایجان تورکلری گونئی آذربایجانین میللی قورتولوشونو یالنیز و یالنیز ایستیقلال و جمهوریت ایداره اصولوندا گؤردوکلری اوچون آذربایجان خالق جمهوریتینی اؤزلرینه نمونه گؤرورلر.
اژدر تاغیزاده
گونئی آذربایجان دئموکراتیک تورک بیرلیگی (گادتب) باشقانی
