GADTB Güney Azərbaycan Demokratik Türk Birliyi
GADTB: Azərbaycanlı vəkil və siyasi məhbus Tahir Nəqəvi dünən 13 Azər 1404-cü il, cümə axşamı səhər saatlarında mülki geyimdə və qandalsız şəkildə Evin həbsxanasından xəstəxanaya aparılıb.
“Abbas Lisaninin məlumat səhifəsi”nin xəbərinə görə, yaxınlarının bildirdiyinə əsasən, müalicə həkimi ilkin müayinədən sonra təcili ultrasəs müayinəsi tələb edib və sidik kisəsinin vəziyyətinin araşdırılması üçün sistoskopiya və biopsiya aparılması barədə göstəriş verib. Həmçinin nevroloq həkim onurğa sütununda olan problemlərə görə yenilənmiş MRT müayinəsi istəyib. Məhkəmə-tibbi ekspertizanın rəyi əsasında, Naqəvinin ortoped mütəxəssis tərəfindən də müayinəsi zəruri hesab olunub.
Mənbənin bildirdiyinə görə, Nəqəvinin bir ildən çox əvvəl aparılmış əvvəlki ultrasəs və MRT müayinələrinin artıq tibbi etibarlılığı yoxdur. Yaxınları qeyd ediblər ki, Evin həbsxanasında tibbi göndəriş prosesi uzun gecikmələrlə müşayiət olunur və bu, Naqəvinin müalicəsinin effektiv şəkildə davam etdirilməsini faktiki olaraq mümkünsüz edir.
Məlumata əsasən, bir gün əvvəl həbsxana rəhbərliyi Tahir Nəqəvini yalnız həbsxana geyimi və qandalla aparmaq şərti qoyduğuna görə, o bu şərtləri qəbul etmədiyi üçün xəstəxanaya göndərilmə onun tərəfindən rədd edilmiş, nəticədə köçürülmə baş tutmamışdı.
Hazırda Tahir Nəqəvi və digər azərbaycanlı siyasi məhbus Vədud Əsədi ailələrinin bildirdiyinə görə aclıq aksiyasının 39-cu günündədir. Onlar son aylarda ictimai-siyasi fəaliyyətlərinə görə Evin həbsxanasında saxlanılırlar və ailələri onların tibbi xidmətə çıxışı, hüquqlarının qorunması və hüquqi qeyri-müəyyənliyə son qoyulmasını tələb edir.
