GADTB Güney Azərbaycan Demokratik Türk Birliyi
GADTB: Bazar ertəsindən çərşənbə axşamına keçən gecə Güney Azərbaycanın və İranın müxtəlif şəhərlərində güclü partlayış səslərinin eşidildiyi barədə məlumatlar yayılıb.
Məlumatlara görə, Təbriz, Urmiya, Tehran, İslamşəhr, İsfahan, Nəcəfabad, Xomeynişəhr, Qürvə və digər yaşayış məntəqələrinin sakinləri səhər saat 04:39–04:45 radələrində ardıcıl partlayış səsləri eşitdiklərini bildiriblər.
Şahidlərin sözlərinə görə, bəzi ərazilərdə partlayış dalğaları binaların titrəməsinə səbəb olub, gecə sakitliyi güclü səslərlə pozulub və çoxsaylı sakinlər yuxudan oyanıblar. Tehranın qərb hissəsində, İslamşəhrdə və Nəcəfabadda bir neçə ardıcıl partlayışın baş verdiyi qeyd olunur.
Yayılan məlumatlarda bildirilir ki, İranın İsrailə raket hücumlarından sonra İsrail tərəfindən İran ərazisindəki bəzi hədəflərə qarşı hava əməliyyatları həyata keçirilib.
İsrail Ordusunun sözçüsü də açıqlamasında Iran ərazisindəki hədəflərə qarşı əməliyyatların başlandığını bildirib.
Hazırda hadisələrin miqyası, hədəflərin dəqiq xarakteri və mümkün itkilərlə bağlı məlumatlar müstəqil mənbələr tərəfindən tam şəkildə təsdiqlənməyib. Münaqişə şəraitində yayılan ilkin məlumatlar sonradan dəyişə və ya dəqiqləşdirilə bilər.
