GADTB Güney Azərbaycan Demokratik Türk Birliyi
GADTB: Ailələrin Siyamək Mirzəyi, Əsgər Əkbərzadə və Əli Vasiqinin Ərdəbil Ümumi və İnqilab Prokurorluğunun 10-cu şöbəsinə dəfələrlə müraciət etməsindən sonra iş üzrə istintaq hakimi bu üç fəalın vəziyyəti və onlara irəli sürülən ittihamlar barədə ətraflı məlumat verməkdən imtina edib, lakin onların aclıq aksiyası keçirdiyini bildirib.
Məlumata görə, 10 tir 1405-ci il çərşənbə günü səhər saatlarında fəalların ailə üzvləri övladlarının taleyi barədə məlumat almaq üçün prokurorluğa müraciət ediblər. Məlumatlı mənbələrin bildirdiyinə görə, iş üzrə istintaq hakimi Kərimi ailələrin təkidindən sonra hər üç şəxs barəsində bir aylıq həbs qətimkan tədbiri seçildiyini və onların saxlanıldıqları yerdə aclıq aksiyası keçirdiklərini deyib.
Əsgər Əkbərzadə və Əli Vasiqi 7 tir tarixində saxlanıldıqları vaxtdan bəri ailələri ilə yalnız bir qısa telefon danışığı edə biliblər və Ərdəbildə rejimin Kəşfiyyat İdarəsinin təcridxanasına aparıldıqlarını bildiriblər. Siyamək Mirzəyi isə saxlanıldığı gündən etibarən ailəsi ilə heç bir telefon əlaqəsi saxlamayıb.
Onların səhhəti, saxlanıldıqları yer, həbs səbəbləri və irəli sürülən ittihamlar barədə rəsmi məlumatın verilməməsi, eləcə də aclıq aksiyası keçirdikləri barədə xəbərlər ailələr və azərbaycanlı fəallar arasında narahatlığı artırıb.
Bu üç azərbaycanlı fəal 7 tir tarixində Ərdəbil və Meşginşəhr şəhərlərində rejimin təhlükəsizlik qüvvələri tərəfindən saxlanılıb. Məlumata görə, saxlanılmadan sonra təhlükəsizlik əməkdaşları onların evlərində və iş yerlərində axtarış apararaq şəxsi və elektron əşyaların, o cümlədən ailə üzvlərinə məxsus mobil telefonların bir hissəsini götürüblər.
