Təbrizin Başmaqçı bazarında yanğın baş verib

GADTB: İyulun 13-də Təbrizin Başmaqçı bazarında yerləşən mağazalardan birində elektrik generatorunun alışması nəticəsində yanğın baş verib.

Bazar esnafının bildirdiyinə görə, hadisə elektrik generatorlarından istifadə zamanı meydana gəlib. Onların sözlərinə əsasən, tez-tez baş verən elektrik kəsintiləri səbəbindən bu generatorlar artıq ticarət obyektlərinin gündəlik fəaliyyətinin ayrılmaz hissəsinə çevrilib.

Sahibkarlar qeyd edirlər ki, davamlı elektrik kəsintiləri və enerji təchizatındakı problemlər biznes fəaliyyətinin dayanmasının qarşısını almaq üçün onları şəxsi generatorlardan istifadə etməyə məcbur edib. Onların fikrincə, bu həll yolu yanacaq, təmir və texniki xidmət xərclərini artırmaqla yanaşı, yanğın kimi hadisələrin başvermə riskini də yüksəldib.

Təbriz bazarının bir sıra tacirləri bildirirlər ki, iqtisadi durğunluq, qiymət artımı və alıcılıq qabiliyyətinin azalması onsuz da ticarət fəaliyyətinə mənfi təsir göstərdiyi halda, tez-tez yaşanan elektrik kəsintiləri və alternativ enerji təminatının əlavə xərcləri sahibkarlar üzərindəki maliyyə yükünü daha da ağırlaşdırıb.