GADTB Güney Azərbaycan Demokratik Türk Birliyi
GADTB: ABŞ-ın Wall Street Journal qəzeti məlumatlı mənbələrə istinadən yazıb ki, ABŞ Prezidenti Donald Tramp son günlər İranla aparılan danışıqların davamlı sülhlə nəticələnəcəyinə dair daha bədbin mövqe tutmağa başlayıb.
Qəzetə danışan ABŞ administrasiyasının yüksəkvəzifəli rəsmilərindən biri bildirib ki, “Tramp hesab edir ki, İranın başa düşdüyü yeganə dil hərbi təzyiqdir.”
Həmin mənbənin sözlərinə görə, Tramp Tehranla bağlı “qisas əhval-ruhiyyəsindədir” və mövcud şəraitdə hərbi əməliyyatların davam etdirilməsindən başqa əlverişli alternativ görmür.
Məlumatda qeyd olunur ki, son iki həftə ərzində İran və ABŞ arasında Hörmüz boğazına nəzarət məsələsi ətrafında qarşılıqlı hərbi zərbələr baş verib. İki ölkə arasında əldə olunmuş kövrək atəşkəsin qısa müddətdə pozulmasından sonra qarşıdurmanın daha da şiddətləndiyi bildirilir.
