GADTB Güney Azərbaycan Demokratik Türk Birliyi
GADTB: Şəbüstər bölgəsinin Şərəfxana şəhərindən olan azərbaycanlı körpə Eylinin valideynləri qızlarının iki aylığını qeyd etdikləri halda, körpə türk mənşəli adına görə Vətəndaşlıq Vəziyyətinin Qeydiyyatı İdarəsinin şəhadətnamə verməkdən imtina etməsi səbəbilə hələ də doğum haqqında şəhadətnamə ala bilməyib.
Körpənin atası Bəhram Əliyar #Balamin_Adi kampaniyasına bildirib ki, qızı 1405-ci il xordadın 25-də dünyaya gəlib və ona «Eylin» adı verilib. Onun sözlərinə görə, bu ad türkcədə «elə mənsub olan, seçilmiş və ailənin əzizi» mənalarını ifadə edir.
Lakin Şəbüstər Vətəndaşlıq Vəziyyətinin Qeydiyyatı İdarəsinin əməkdaşları şəhadətnamə verməkdən imtina edərək bildiriblər ki, adın türk mənşəli olması və tərkibində «e» hərfinin işlənməsi səbəbindən sistem onu qəbul etmir. Onlar uşağın adını yalnız «Alin» və ya «Əlin» formasında qeyd edə biləcəklərini bildiriblər.
Valideynlər isə bu təkliflə razılaşmayıblar. Onların sözlərinə görə, həmin yazılış formaları fərqli məna daşıyır və «Eylin» adının mənasını ifadə etmir. Buna görə də ailə məhkəməyə müraciət edərək hüquqlarının qanuni yolla təmin olunmasını tələb edib.
Bəhram Əliyar bildirib ki, uşağa ad seçmək valideynlərin ən təməl hüquqlarından biridir və bu hüquqdan imtina etmək niyyətində deyillər.
Qeyd olunur ki, əvvəllər də eyni adla bağlı oxşar problemlər yaşanıb. Məsələn, 2023-cü ilin iyulunda Təbrizdə Mir Məcid Nəqizadə ailəsi beş ay davam edən hüquqi mübarizədən sonra məhkəmə qərarı ilə övladına «Eylin» adı ilə doğum haqqında şəhadətnamə almağa nail olub.
Məlumata görə, Vətəndaşlıq Vəziyyətinin Qeydiyyatı İdarəsinin türk adlarına qarşı tətbiq etdiyi üsullardan biri məhkəmə həmin adların qeydiyyata alınması barədə qərar çıxardıqdan sonra belə onları «qadağan olunmuş adlar siyahısından» çıxarmamaqdır. Nəticədə başqa bir ailə eyni adla müraciət etdikdə, həmin adın sistemdə mövcud olmadığı əsas gətirilərək şəhadətnamənin verilməsindən imtina edilir.
Beləliklə, valideynlər əvvəlki ailələrin keçdiyi uzun və xərcli hüquqi mübarizəni yenidən aparmaq məcburiyyətində qalırlar.
Uşağın doğum haqqında şəhadətnaməsiz qalması isə bir sıra ciddi problemlərə səbəb ola bilər. Bunlara sığorta, peyvənd və tibbi xidmətlərdən məhrum qalmaq, valideynlərin dövlət yardımları və sosial ödənişlərdən yararlanmasında çətinliklər, ailəyə əlavə maliyyə yükünün yaranması, eləcə də valideynlər üçün psixoloji təzyiq və gərginlik daxildir.
