گادتب:31 یانوار آذربایجان خالق جمهوریتینین بانیسی، بؤیوک دؤولت و اجتماعی خادیم، سیاستچی و پوبلیسیست، آذربایجان تورک میللتینین داهی اؤندری محمد امین بی رسولزادهنین دوغوم گونودور. 1884-جو ایل یانوارین 31-ده باکینین نووخانی کندینده دونیایا گؤز آچان محمد امین رسولزادهنین بو ایل 135 ایللیگیدیر.
محمد امین رسولزاده آذربایجان تاریخینه هم ده شرق عالمینده و تورک دونیاسیندا ایلک دموکراتیک، پلورالیست و دونیوی آذربایجان دؤولتینی قورماقلا دوشوب. بوگونکو موستقیل آذربایجان دؤولتی اصلینده محمد امین بی رسولزادهنین قوردوغو آذربایجان خالق جمهوریتینین داوامیدیر.
تورک دونیاسیندا ایلک دموکراتیک پارلامئنتلی رئسپوبلیکا اولان آذربایجان خالق جمهوریتینین جمعی 23 آی عؤمور سورمهسینه و قیزیل اوردونون آذربایجانی ایشغال ائتمهسی نتیجهسینده سقوطا اوغراماسینا باخمایاراق، محمد امین رسولزادهنین قوردوغو دموکراتیک آذربایجان دؤولتی اینسانلارا چوخ بؤیوک حقوق و آزادلیقلار وئرمیشدی. اینسانلارین برابرلیگی پرینسیپلرینه اساسلانان آذربایجان خالق جمهوریتی هله غربده بئله قادینلارین سئچمک و سئچیلمک حقوقو اولمادیغی بیر واختدا قادینلارا بو حقوقو وئرمیشدی.
گونئی آذربایجان دموکراتیک تورک بیرلیگی (گادتب) مستقیل آذربایجان رئسپوبلیکاسینی محمد امین رسولزادهنین قوردوغو آذربایجان خالق جمهوریتینین واریسی کیمی تکجه قوزئیلی سویداشلاریمیزین دئییل، بوتون دونیا آذربایجانلیلارینین دؤولتی حساب ائدیر. بو دؤولت گونئی آذربایجاندا مستقیل آذربایجان دؤولتینین و عمومیتله بوتؤو آذربایجانین یارانماسی اوچون دایاق نقطهسی، ایدئیا قایناغیدیر. گادتب گونئییمیزین میللی قورتولوشونو یالنیز و یالنیز ایستیقلال و جمهوریت ایداره اصولوندا گؤروب آذربایجان خالق جمهوریتینی اؤزونه نمونه حساب ائدیر، محمد امین رسولزادهنین تورکچولوک ایدئاللارینا صداقتله گونئی آذربایجانین موستقیللیگی و بؤتوو آذربایجانین یارانماسی اوغروندا فعالیت گؤسترمه یی اؤزونه شرف بیلیر.
گونئی آذربایجان دموکراتیک تورک بیرلیگینین (گادتب) باشقانی اژدر تاغیزاده