ادتاج اتحادیه دمکراتیک ترک آذربایجان جنوبی
گادتب: ایراندا بوغدانین ایللیک مصرفی تقریبن 12 میلیون توندور و بیزیم بو اؤلکه آسانلیقلا 18 میلیون تون بوغدا تولید ائده بیلدیگی حالدا، ایندی فقط 6 میلیون تون بوغدا تولید ائدیب، قالانینی خاریجدن گتیریر.
روسیانین اوکراینا موداخیلهسی بوغدا، آرپا، مکه و گونهباخان یاغی بازارینا جیددی تاثیر گؤستریب، فقط بیر هفته عرضینده بعضیلرینین قیمتی ایکی قات آرتیبدیر. اوکراینا مکه و گونهباخان یاغینین ان اؤنملی تولیدچیلریندن بیری اولاراق، دونیا صادراتینین 16% -سینی تامین ائدیر و دونیا بوغدا صادراتینین 30% -و روسیا و اوکراینادان گلیر.
دؤولتلر بو ساواشین هله- هله سورهجهیینی و چوخ بیر شئیلری تاثیر آلتینا آلاجاغینی باشا دوشوبلر سانکی. قیرغیزیستاندان قازاخیستانا، چیندن سعودی عربیستانا قدر اکثر دؤولتلر، بیر- ایکی ایللیک بوغدا احتیاجلارینی ییغیبلار.
ابراهیم رئیسینین مسکووا سفرینین حاشیهلری (ناماز، پیس استقبال، قو قو قو)، متندن داها شیرین ایدی و آز آدام سفرین هدفینه دیققت یئتیردی. بعضیلرینه گؤره، رئیسی بو سفره دعوتسیز (خودخوانده قوناق) گئتمیشدی و پوتین بو گؤروشه راضی اولمادیغی اوچون، اونو چوخ پیس قارشیلامیشدی. بو آداملارا گؤره، رئیسی بو سفرده پوتینه وعدهلر وئریب، اونو ایران و غرب دانیشقلاریندا ایران طرفلی اولماغا چاغیرمیشدی.
سونراکی گونلرده، مکرونون مسکووا سفری و ایلهام علییئفین مسکووایا مجبوری و چاغیریشلی سفری (ساواشین باشلاماسینا بیر نئچه ساعات قالمیش) گؤستریر کی، اصلینده رئیسی مسکووایا پوتینین احضاری و دعوتی ایله گئدیب و سؤز قونوسو ایران غرب دانیشیغی یوخ، بلکه تئزلیکله باشلاناجاق ساواش ایمیش. پوتین بو چاغیریشلاردا ایران، آذربایجان و آوروپانین (فرانسا نماینده اولاراق) او ساواش حاقدا نظرلرینی اؤیرنیب اؤز نظرلرینی دیکته ائتمهیه چالیشیرمیش.
دئمهلی بیزیم حؤکمدارلار بو ساواشین باشلاماسینی اؤنجهدن بیلیرمیشلر، آما قرغیزیستان، عربیستان و باشقالاری کیمی، اؤلکه احتیاجلارینی اؤدمک اوچون لازیمی آددیملاری آتماییبلار، فقط «تئزلیکله اوز وئرهجک آجلیغین قیشقیریغا سبب اولاجاغینی» یاخشی بیلدیکلری اوچون، ایندیدن سانال فضالاری محدودلاشدیرماغا جیددی پلانلار تؤکوبلر.
