GADTB Güney Azərbaycan Demokratik Türk Birliyi
GADTB-nin Mətbuat Mərkəzinə daxil olan məlumata görə, azərbaycanlı öyrənci və fəallar Təbrizdə vərəqələr yaymaqla keçirilən etiraz aksiyalarında milli istəklərin gündəmə gətirilməsi zərurətinə təkid etdilər.
Şəhərin əksər məhəllələrində yayılan yazılı vərəqələrdə Azərbaycan türklərinə qarşı müstəmləkə siyasəti və haqsızlıqlara toxunularaq, etiraz aksiyalarının sırf bu məsələlərə qarşı keçirilməsinə çağırış ediblər.
Sentyabrın 30-u gecə azərbaycanlı gənclər minlərlə vərəqə paylayaraq 43 illik molla hakimiyyəti dönəmində başqa xalqlarla yanaşı Azərbaycan türklərinə qarşı edilən haqsızlıqlara toxunulub.
Yayılan vərəqələrdə Azərbaycan türklərinin ana dilində təhsil almaqdan məhrum edilmələri, onların tarix və kimliklərinin saxtalaşdırılması, yeraltı və yerüstü sərvətlərinin fars bölgələrinə daşınması və başqa məsələlər qeyd olunub.
Çağırış vərəqələrinin bir hissəsində yazılıb: “43 ildir ki, qadınların öz geyim tərzlərini seçmək hüququ əllərindən alınıb, din və namus adı altında hakimiyyətin gerici ideoloji düşüncələri onlara təhmil edilib. 43 ildir haqq səsini qaldıranlara həbs, işkəncə və edamla cavab verilib”.
Vərəqələrdə Azərbaycana qarşı ayrıseçkilik, müstəmləkə siyasəti, Urmiya gölünün qurudulması və s. məsələlər də öz əksini tapıb.
