ادتاج اتحادیه دمکراتیک ترک آذربایجان جنوبی
گادتب: 1945-جی ایل 21 آذر-ده قورولان آذربایجان میللی حکومتی مین ایللر بویو بؤیوک ایمپئراتورلوق‌لار قوران آذربایجان تورک میللتی‌نین گونئی آزربایجانین معاصیر دؤور دؤولتچیلیک مدئلینه کئچدی و غرب ایمپئریالیزمی‌نین چئوریلیشله فارس فاشیزمینی حاکمیته گتیره‌رک ایتیریلمیش ایستیقلالینین برپاسینین باشلانغیجی ایدی. بو مقدس یولدا میللی حکومتی قوران سید جعفر پیشه وری دئییردی: “اؤلدو وار دؤندو یوخ‌دور”. آذربایجان میللی حکومتی‌نین هر طرفدن شووینیست و جینایتکار فارس رئژیمی و اونون حمایه‌چی‌لری‌نین تضییقی و هوجومو نتیجه‌سینده سقوطون‌دان سونرا آزربایجانین دوشمن‌لری بو سؤزو لاغا قویا‌راق، “اؤلدو ده وار ایمیش دؤندو ده” دئییردی‌لر. لاکین باشا دوشموردولر کی، پیشه وری بو سؤزو تکجه او دؤنم اوچون یوخ، بو گون اوچون ده دئییرمیش. بو حرکات داوام ائدیر و آذربایجان تورک میللتی اؤز موستقیل‌لیگینی الده ائتمه ینه دک مباریزه‌دن ال چکمه‌یه‌جک.
21 آذر حرکاتی صینفی مباریزه یوخ، میللی حرکات ایدی. حرکاتین باشچی‌سی سید جعفر پیشه وری دفعه‌لرله تکرار ائدیردی کی، بو حرکات میللی حرکات‌دیر، صینفی حرکات دئییل. آذربایجان تورک‌لری بیر-بیرینه قارشی موجادیله آپارمیرلار. بلکه فارس شووینیزمینه قارشی مباریز آپاریب، آذربایجان تورکجه‌سینده مکتب، اونیوئرسیتئت، مطبوعات و رادیونون آچیلماسینا چالیشیرلار و بونو دا ائتمیشدی‌لر.
21 آذر حرکاتی ایله گونئی آذربایجانا یئنی روح گلدی. آزاد مطبوعات، فیکیر آزادلیغی و عمومیتله آذربایجانا آزادلیق گلدی. بو دا ایرقچی و ایرتیجا‌چی فارس شووینیزمینی، ائله‌جه ده اونلاری دستکله‌ییب حاکمیته گتیرن باشدا اینگیلتره اولماقلا دونیا موستملکه‌چی‌لرینی قورخویا سالدی. بئله کی، دونیا موستملکه‌چی‌لری موسکوا کونفرانسیندا آزربایجانین موختاریت قازانماسینا بئله ایجازه وئرمه‌دی‌لر. بونون آردین‌دان ایسه تهران رئژیمی بوتون آنلاشما‌لارا رغماً آذربایجانا هجوما کئچیب، آذربایجان تورک‌لرینه قارشی دهشتلی سویقیریم تؤرتدی.
البته سید جعفر پیشه وری بهانه‌لرین بیر دفعه‌لیک اورتا‌دان قالخماسی اوچون دئموکراتیا، موختاریت، فئدئرالیزم و پارلامئنتاریزمی ده یوخلادی. لاکین تهرانین ایرتیجا‌چی-شووینیست فارس رئژیمی و اونون حمایه‌دارلاری گؤستردی‌لر کی، بو بؤلگه‌ده و قوندارما ایران آدی آلتیندا اولان اراضیده آذربایجان تورک میللتینه هئچ زامان اؤز مدنی و اینسانی حقوق‌لارینا چاتماغا ایجازه وئرمه‌یه‌جک‌لر. 21 آذر حرکاتینین باشلانغیجی و فاجعه وی سونو دا گؤستردی کی، آذربایجان تورک میللتی یالنیز اؤزونه گوونمه‌لی‌دیر. میللت اؤزونه گوونیب، ایراده‌سینی سرگیله‌سه هئچ بیر ایمپئریانین حمایه‌سینه ده مؤحتاج اولماز. بیز اؤز میللتیمیزه گوونیریک. بیزیم لیدئرلریمیز محمد امین رسول‌زاده، پیشه وری، ابولفضل ائلچیبی و آتاتورک ده گؤستردی کی، گوج تورک میللتینده‌دیر. آذربایجاندا دا آذربایجان تورک میللتی ایراده ائدنده اؤز مجلیسینی، اؤز دؤولتینی و اؤز اوردوسونو یارا‌دیر. سرحدلرینه، سینیرلارینا اؤزو صاحب چیخیر. بو گون 21 آذر حرکاتینین عنعنه‌سینه دایانا‌راق، آزربایجانین گونئیی‌نین تکجه بیر یولو قالیب. او دا اؤز ایستیقلالینی الده ائدیب و آزربایجانین موستقیل دؤولتینی یاراتماق‌دیر. بو حرکاتین بیزه تکجه بیر مئساژی وار. او دا فارسا، فارس شووینیزمینه اینانما‌دان یالنیز اؤز گوجوموزه دایانیب آذربایجانی آزاد ائتمک. بیر سؤزله پیشه وری دئمیشکن بو میللته موستقیل‌لیگینی الده ائدنه دک نه اؤلدو وار نه دؤندو.
گونئی آذربایجان دئموکراتیک تورک بیرلیگی (گادتب) آذربایجان تورک میللتینی گونئی آذربایجاندا میللی دؤولت‌چی‌لیگی و موستقیل‌لیگینی برپا ائتمک اوچون میللتیمیزی بیرلییه و ایستیقلال‌چی تشکیلات‌لار اطرافیندا بیرلشه‌رک حاق‌لی مباریزه‌میزی گوجلندیرمه‌یه چاغیریر. بو گون آذربایجان تورک میللتی آزربایجانین گونئیینده معاصر دؤور دؤولتچیلیک تاریخیمیزده چوخ اؤنم‌لی رولو اولان 21 آذری حساس بیر مرحله‌ده قارشیلاماقدا‌دیر. آذربایجان تورک میللتی‌نین اویانیشی و آزربایجانین موستقیل‌لیگی اوغروندا مباریزه‌یه داوام ائتمه‌سیله فارس شووینیزمی طرفین‌دن قانلا بوغولموش اؤنجه کی میللی حرکات‌لاریمیزدان سونرا بو حرکاتیمیزین بار وئره جه یینه بؤیوک اومید بسله نیلیر. آرخایین‌لیقلا دئمک اولار کی، گؤزونوز آرخادا قالماسین، فارس شووینیزمی شئیخ محمد خیابانی حرکاتی و 21 آذر حرکاتینی قانلا بوغوب، آذربایجانی ایشغال ائتدیسه، بو دفعه موباریزه داها گوج‌لو شکیلده داوام ائدیر و موستقیل‌لیک اوغروندا مباریزه‌میزین بار وئره جه یینه اینانیریق.
اژدر تاغی‌زاده
گونئی آذربایجان دئموکراتیک تورک بیرلیگی (گادتب) باشقانی
