گادتب: بؤيوک ايمپئراتورلوقلار قوران آذربايجان تورک ميللتي روسلارلا قاجار دؤولتينين موحاريبه سي نتيجهسينده پارچالانميش و اسارته دوشموشدور. آنجاق 100 ايل اؤنجه ميللتيميزين داهي اوغوللاري آذربايجانين قوزئي حيصه سينده 1918-جي ايل ماي آيينين 28-ده تورک دونياسي و عوموميتله شرق عالمينده ايلک دموکراتيک، پلوراليست و دونيوي آذربايجان دؤولتيني ياراتدي. اصلينده محمد امين بي رسولزادنين قوردوغو آذربايجان خالق جومهوريتي آذربايجان تورک ميلتينين چوخ عصرليک دؤولتچيليک تاريخينين پارلامئنتلي جمهوريت فورماسيندا چاغداش دؤورده داوامي اولموشدور.
تورک دونياسيندا ايلک دموکراتيک پارلامئنتلي جمهوريت اولان آذربايجان خالق جمهوريتي همين دؤورون شرطلري چرچيوهسينده جمعي 23 آي عؤمور سورمهسينه و سووئت اوردوسونون آذربايجاني ايشغال ائتمهسي نتيجهسينده سوقوتا اوغراماسينا باخماياراق، بو دموکراتيک آذربايجان دؤولتي آذربايجان تورک ميلتينين گلهجک دؤولتچيليگي اوچون عوضسيز ايشلر گؤرموشدور. بو گون ده آذربايجان خالق جومهوريتي موعاصير دؤور آذربايجان تورک ميلتينين دؤولتچيليگينين و دؤولتينين بونؤورهسيني قويموشدور. بوگونکو موستقيل آذربايجانين بايراغي، هيمني و ديگر دؤولت آتريبوتلاري آذربايجان خالق جمهوريتينده قبول ائديلميشدير. آذربايجان تورک ميللتي موعاصير آذربايجان دؤولتي و دؤولتچيليگينين وارليغيني صيرف آذربايجان خالق جمهوريتينه و اونو قوران آذربايجانلي دؤولت خاديملرينه بورجلودور.
آذربايجان خالق جومهوريتي قيسا مدت عرضينده دؤيوش قابيللييتينه ماليک آذربايجان اوردوسونو تشکيل ائتميش، دؤولت قوروجولوغونون بوتون ساحه لرينده ثمره لي ايش آپاريلميش، پارلامئنت ياراديلميش و يئني، ميللي طلبلر، دموکراتيک پرينسيپلره اويغون اولان دؤولت اورقانلاري قورولموشدو. آذربايجانين تاريخينده ايلک اونيوئرسيتئت – باکي دؤولت اونيوئرسيتئتي ياراديلميش، تحصيلين ميلليلشديريلمهسي، يئني تدريس موسيسهلرينين آچيلماسي ساحه سينده آذربايجان تورک ميلتينين سونراکي مدني ترّقيسي اوچون اساسلي زمينه چئوريلن بير سيرا اؤنملي ايشلر گؤرولموشدور.
محمد امين بي رسول زاده نين، فتحعلي خان خويلونون و باشقا آذربايجان اوغوللارينين قوردوغو آذربايجان خالق جمهوريتي آذربايجانين چاغداش دؤور دؤولتچيليگينه اساس و بونؤوره اولماقلا ياناشي، سيويل دونيايا دا موترقّي دگرلر تؤحفه وئرميشدير. آذربايجان خالق جمهوريتينده اينسانلارا چوخ بؤيوک حقوق و آزادليقلار وئریلميشدير. اينسانلارين برابرليگي پرينسيپلرينه اساسلانان آذربايجان خالق جومهوريتي هله غربده بئله قادينلارين سئچمک و سئچيلمک حوقوقو اولماديغي بير واختدا قادينلارا بو حوقوقو وئرميشدي.
آذربايان خالق جمهوريتينين واريثي کيمي موستقيل آذربايجان جمهوريتینین تکجه قوزئیلي سويداشلاريميزين دئييل، بوتون دونيا آذربايجانليلارينين دؤولتيدير. بو دؤولت گونئي آذربايجاندا دؤولتي و بوتؤو آذربايجانين يارانماسي اوچون داياق نؤقطهسي، ايدئيا قايناغيدير. گونئي آذربايجان ايستيقلالچيلار بيرليگينين (گايب) آذربايجان خالق جمهوريتينين داوامي اولان موستقيل آذربايجان جمهوريتینی دونيا آذربايجانليلارينين موستقيل دؤولتي حساب ائدهرک، جمهوريتين تورکچولوک ايدئاللارينا صداقتله گونئي آذربايجانين موستقيل و بوتؤو آذربايجانين يارانماسي اوغروندا فعاليت گؤسترمگي اؤزونه شرف بيلير.
گونئي آذربايجان ايستيقلالچيلار بيرليگي (گايب)