GADTB Güney Azərbaycan Demokratik Türk Birliyi
GADTB: ABŞ mediasının yaydığı məlumatlara görə, ABŞ Kosmik Qüvvələri (US Space Force) İran İslam Respublikası ilə informasiya və hərbi qarşıdurmada aktiv rol oynayır və İranın nüvə proqramı ilə hərbi fəaliyyətlərini davamlı olaraq kosmosdan izləyir.
Bildirilir ki, 2019-cu ildə Donald Trampın ilk prezidentlik dövründə yaradılan bu qüvvə İranla bağlı əməliyyatlarda, o cümlədən elektron müharibə, rabitə sistemlərinin pozulması, raket buraxılışlarının izlənməsi və İranın hava hücumundan müdafiə sistemlərini zəiflətmək üçün hədəf məlumatlarının təqdim edilməsində iştirak edir.
Donald Tramp son günlər açıqlamasında ABŞ Kosmik Qüvvələrinin İranın nüvə obyektlərini və zənginləşdirilmiş uran ehtiyatlarını xüsusi nəzarətdə saxladığını bildirib. O deyib: “Əgər kimsə bu mərkəzlərə yaxınlaşsa, biz bundan xəbərdar olacağıq.”
Məlumatlarda qeyd olunur ki, ABŞ Kosmik Qüvvələrinin fəaliyyəti yalnız İranın izlənilməsi ilə məhdudlaşmır. Bu qüvvə ABŞ Müdafiə Nazirliyinə aid hərbi peyklərə nəzarət edir və quru, dəniz və hava qüvvələri üçün GPS, təhlükəsiz hərbi rabitə və raket xəbərdarlıq sistemləri kimi həyati xidmətlər təmin edir.
ABŞ Kosmik Qüvvələrinin həmçinin yerüstü radarlar və kosmik sensorlardan istifadə etməklə peyklər və orbital qalıqlar daxil olmaqla 40 mindən çox kosmik obyekti izlədiyi, mümkün təhdidlərin və kosmosda toqquşmaların qarşısını almağa çalışdığı bildirilir.
Eyni zamanda, bu qüvvənin strukturunu sürətlə genişləndirdiyi qeyd olunur. Hazırda ABŞ Kosmik Qüvvələrinin təxminən 14 min aktiv hərbçisi və 4 min mülki əməkdaşı var. Qurumun şəxsi heyətin artırılması və daha çox “Guardian” qüvvələrinin cəlb edilməsi istiqamətində proqramlar həyata keçirdiyi bildirilir.
