Xarg adasında neft yüklənməsi dayandı; İran ixracatda görünməmiş böhranla üzləşib

GADTB: Artıq səkkizinci gündür ki, Xarg adasından heç bir xam neft yükü daşınmayıb. Bu görünməmiş hadisə İran İslam Respublikasının ən mühüm neft ixrac terminalı üzərində artan təzyiqləri daha da aydın şəkildə ortaya qoyur.

Məlumatlara görə, quru anbarlarında neft saxlama tutumu tam dolub və vəziyyətin davam etməsi ixrac zəncirində, eləcə də neft hasilatının idarə olunmasında ciddi problemlər yaradıb.

Eyni zamanda, ilkin qiymətləndirmələr neft kəmərlərindən birində problem yarandığını göstərir. Bu isə İran rəsmilərini böhranı nəzarətdə saxlamaq üçün müvəqqəti həll yolları və alternativ variantlara müraciət etməyə məcbur edib.

Digər tərəfdən, ABŞ-ın neft daşımalarına qarşı tətbiq etdiyi təzyiqlər nəticəsində xam neft daşıyan iri tankerlərin hərəkəti dayanıb və İranın ixrac marşrutları ciddi çıxılmaz vəziyyətə düşüb.

Baş verən hadisələr İranın neft ixracı infrastrukturunun həssaslığını və rejimin Xarg terminalından yüksək asılılığını bir daha gündəmə gətirib.