GADTB Güney Azərbaycan Demokratik Türk Birliyi
GADTB: The Washington Post qəzeti ABŞ-ın Mərkəzi Kəşfiyyat İdarəsinin (CIA) yeni kəşfiyyat qiymətləndirməsinə istinadən yazıb ki, ABŞ ordusunun İrana qarşı hazırkı hücumlarının İran hakimiyyətini mövqeyini dəyişməyə vadar etməsi “çətin görünür.”
SEPAH-ın anlaşma memorandumunun imzalanmasından sonra Oman sahilləri yaxınlığında bir neçə ticarət gəmisinə hücum etməsinin ardınca ABŞ ordusu artıq 10 gecədir ki, əsasən İranın cənub bölgələrinə zərbələr endirir.
Bununla belə, The Washington Post bir neçə keçmiş və hazırkı ABŞ rəsmisinə istinadən bildirib ki, yeni kəşfiyyat qiymətləndirməsinə əsasən, gecə hücumlarının Tehrana “əhəmiyyətli təsir göstərməsi” və ya İran hakimiyyətini danışıqlarda mövqeyini dəyişməyə məcbur etməsi ehtimalı azdır.
Rəsmilərin sözlərinə görə, ABŞ kəşfiyyat orqanlarının, xüsusilə CIA-nın qiymətləndirməsinə əsasən, Tehran və Vaşinqton hazırda müharibə ilə sülh arasında qeyri-müəyyən bir vəziyyətdədir və bu hücum dalğasının həmin vəziyyəti dəyişdirməsi ehtimalı aşağıdır.
Yeni kəşfiyyat hesabatında CIA ekspert və analitikləri İsrail və ABŞ-ın hücumları nəticəsində İranın bir çox yüksək vəzifəli rəsmisini və silah arsenalının böyük hissəsini itirməsinə baxmayaraq, Tehran rejiminin davamlılığını vurğulayıblar.
ABŞ-ın rəsmi qurumları hələlik bu hesabatla bağlı açıq şəkildə münasibət bildirməyiblər.
