Azərbaycanlı siyasi məhbus Əkbər Nəiminin məhkəmə işinə yenidən baxılması tələbindən sonra dosye Ali Məhkəməyə göndərildi

GADTB-nin Mətbuat Mərkəzinə daxil olan məlumata görə, irqçi fars rejimin həbs etdiyi Güney Azərbaycanın Xoy şəhərindən olan azərbaycanlı siyasi məhbus Əkbər Nəiminin məhkəmə işinə yenidən baxılması tələbindən sonra dosye Ali Məhkəməyə göndərilib. Lakin xəbər hazırlanana qədər işlə bağlı heç bir məlumat verilmir.

Azərbaycanlı fəalın dosyesi ilə tanış olan mütəxəssislər bildirirlər ki, fəalın ilkin və apellyasiya məhkəməsi İran rejiminin ETTELAAT İdarəsinin məmurlarının hesabatı əsasında və fəalın özünü müdafiəsinə imkan verilmədən, tam qərəzli şəkildə keçirilib.

Qeyd edək ki, Əkbər Nəimi 2020-ci il yanvarın 22-də çalışdığı İranın milli hava yolları şirkətinin təmir bölməsində yaxalanaraq təxminən 2 ay təhlükəsizlik qüvvələrinin nəzarətində saxlanıldıqdan sonra 200 milyon tümənlik girov qarşılığında Evin zindanından zaminə buraxılmışdı.

Əkbər Nəimi şərlənərək, “Qanunsuz qrupa üzv olmaq”, “Milli təhlükəsizliyə qarşı toplaşmaq və əlbir olmaq” və “Rejimin müxalif qruplarının xeyrin təbliğat aparmaq” ittihamları ilə müvafiq olaraq 5 il, 4 il və 8 ay həbs cəzasına məhkum edilib.

İrqçi fars rejim Əkbər Nəimini sadəcə Azərbaycan uğrunda mədəni fəaliyyətlərinə görə 9 il 8 ay həbs cəzasına məhkum edib. Qərar rejimin Apellyasiya Məhkəməsi tərəfindən təsdiqlənib və o Tehranın Evin zindanında həbs cəzasını çəkməkdədir.

Əkbər Nəimi həmçinin 2 il müddətinə xaric çıxması, eləcə də siyasi partiyalara və ictimai qruplara üzv olmasına da qadağa qoyulub.

Güney Azərbaycanın Xoy şəhərindən olan azərbaycanlı fəal Əkbər Nəimi iyunun 19-da Təbrizdə rejimin məmurları tərəfindən həbs edilərək Tehranın Evin zindanına köçürülmüşdü.