GADTB Güney Azərbaycan Demokratik Türk Birliyi
GADTB: Azərbaycanlı fəallar Sima (Əkrəm) Əlipur, Nima Radməniş, Hüseyn İsmaili-Soməə, Salar Tahirəfşar və Vəhid Əbhəri İrənəq haqqında məhkəmə hökmləri çıxarılaraq onlara elan edilib. Yayılan məlumatlara əsasən, fəalların hər biri Zabol şəhərində bir il müddətinə həbs cəzasına, həmin şəhərdə iki il məcburi yaşayışa və iki il müddətinə elektron xidmətlərdən istifadə hüququndan məhrumetməyə məhkum edilib.
Fəalların həbs və məcburi yaşayış cəzalarının icra yeri kimi Zabol şəhəri müəyyənləşdirilib. İnsan hüquqları təşkilatlarının hesabatlarına və keçmiş siyasi məhbusların bəzi açıqlamalarına görə, Zabol həbsxanasında məişət şəraiti və məhbusların saxlanma şəraiti ilə bağlı ciddi problemlər mövcuddur.
Çıxarılmış hökmlərin digər bir hissəsində bu şəxslərə məxsus mobil telefonların və yaddaş qurğularının məlumatlarının bərpası barədə göstəriş də yer alıb. Yayılan məlumatlara əsasən, məlumatların bərpası mümkün olmadıqda cihazların məhv edilməsi və SİM-kartların telekommunikasiya sistemindən silinməsi nəzərdə tutulub.
Bu hökmlərin icrası azadlıqdan məhrumetmə ilə yanaşı, fəalların gündəlik həyatında, ünsiyyətində və ictimai xidmətlərə çıxışında da məhdudiyyətlər yarada bilər.
İndiyədək yayılan məlumatlarda bu beş fəala qarşı irəli sürülən ittihamlar, məhkəmə sübutları və işlərə baxılması prosesi barədə ətraflı məlumat verilməyib.
