Bessent: İranın iqtisadi təzyiq altında milli valyutası rekord səviyyədə ucuzlaşıb, iki həftəyə ticarət üçün heç nə qalmayacaq

 GADTB: ABŞ-ın maliyyə naziri Skott Bessent bildirir ki, Vaşinqtonun İran İslam Respublikasına qarşı həyata keçirdiyi “iqtisadi təcridetmə” kampaniyası rialın dəyərini tarixdə ən aşağı səviyyəyə endirib və Tehranın maliyyə resurslarına təzyiq davam edəcək.

Bessentin sözlərinə görə, İranın satışa çıxara bildiyi neftin kəskin azalması fonunda mövcud tendensiya davam edərsə, “iki həftə ərzində ticarət üçün heç nə qalmayacaq”.

Bessent həmçinin vurğulayıb ki, ABŞ hökuməti İran İslam Respublikasının silahlı qrupları və nüvə proqramını maliyyələşdirmək imkanlarını məhdudlaşdırmağa davam edəcək. ABŞ Maliyyə Nazirliyinin “iqtisadi təcridetmə əməliyyatı” çərçivəsində son həftələrdə İranın bank şəbəkələri, aviasiya sektoru və sanksiyalardan yayınma mexanizmləri hədəfə alınıb.

Eyni zamanda, rial bazar ertəsi dollar qarşısında yeni tarixi minimuma düşüb. Reuters azad bazarda dolların məzənnəsinin təxminən 2,50 milyon riala, yəni hər dollar üçün 250 min tümənə çatdığını bildirib.

Rialın kəskin ucuzlaşması Vaşinqton və Tehran arasında vasitəçilər üzərindən əlaqələrin davam etdiyi bir vaxtda baş verib. Lakin tərəflər mümkün razılaşmanın şərtləri, o cümlədən nüvə məsələsi, iqtisadi təzyiqlərin aradan qaldırılması və Hörmüz boğazının statusu ilə bağlı ciddi fikir ayrılıqları yaşayırlar.